KRALENDIJK — Diputado Nina den Heyer a reakshona tokante e renobashon di himno i a trese dilanti ku e ta hanja lamentabel ku e informashon a sali prome ku nan mes komo Gobiernu ke a trese dilanti komo un sorpresa pa pueblo i alabes ela wordu trese dilanti den un bachi ku un tono negativo.
El’a sigui splika ku no ta bai kambia ningun letra di e himno aktual ni no ta mishi ku e melodia. Nina a sigui splika ku esaki ta un desaroyo ku diferente pais a hasi den transkurso di tempu i a yega ora pa Boneiru su himno tambe bria ku su bunitesa. Enkuanto esaki un orkesta lo bai toka e himno di Boneiru ku ta bai wordu graba awo.

E idea pa renoba nos himno a nase dor di un hoben di Boneiru kual ta Ito Martis ku porsierto a wordu nomina pa un grammy algun anja pasa. Ela bini ku un areglo di un orkesta i a laga Gobiernu skucha esaki i tambe diferente hende mas anto asina e idea a lanta pa renoba i polish nos himno su areglo.

Nina den Heyer a splika ku e suma di masomenos 44 mil doler no ta basa solamente riba e grabashon huntu ku e orkesta pero ta henter un tim lo bai pa traha un mini dokumental. E sen ku ta bai wordu uza pa paga esaki ta sen ku gobiernu a risibi speshalmente pa e parti di kultura di kual a paga algun banda i musiko nan tambe pa ku e temporada di krisis. Di e pochi di kultura e sen a wordu uza, pues esei ta nifika ku pa niun otro motibu e sen aki lo no por a wordu uza pa otro kosnan por ehempel pa kombati pobresa. Hulanda a manda sen pa kultura i esaki a wordu usa debidamente pa kultura. Kontinuando Nina a bisa ku tin diferente Gobiernu anterior a trata e topiko aki pero niun no a kristalisa pa ku e proyekto aki i ku awo ku Boneiru a hanja sen di Hulanda lo uza esaki pa kristalisa e proyekto di renobashon di himno di Boneiru. Nos himno ta wordu toka tu kaminda ku Boneiru tin algu ofisial i kaminda ku nos tin representashon di kualke deporte i ki bunita ta pa tende un himno bunita ku un areglo nobo pa nos komo Boneriano sinti nos mas orguyoso.
Nina den Heyer a bisa finalmente ku den rueda di prensa manjan kutopiko Dia di Boneiru nan lo mester a papia tokante esaki i ta lamenta ku tin periodistanan a pasa prome ku nan i a kita e waw-effect.

FUENTE: LIVE 99 FM

Share This
error: Content is protected !!