Awe mainta nos ta wak bèk un ratu riba desaroyo di e vírùs di corona na Boneiru for di e momentu ku e variante di Dèlta a yega nos isla den e di dos mitar di yüli. Último tempu e kantidat di kontagio a keda basta stabil. Tòg nos ta mira e último simannan akí ku e kantidat di kontagio nobo ta subi levemente. Na kuminsamentu di yüli tabatin un promedio di 10 kaso nobo pa siman. Awor akí, fin di ougùstùs, tin mas òf ménos 20 kaso pa siman.

Esaki ta e grafik ku e kantidat total di kaso di COVID na Boneiru for di e promé kantidat grandi di kontagio na luna di sèptèmber 2020. Boso por mira ku tin ora e liña ta subi steil, einan e kantidat di kaso di COVID-19 tabata subi hopi rápido. E parti di e liña ku ta subi pokopoko ta mustra ku einan e kantidat di kaso di COVID-19 ta subi pokopoko. Awor akí tambe nos ta mira ku e liña ta keda subi pokopoko.

Awor akí mayoria di e plamamentu ta tuma lugá den kasnan di famia ku hende ku no a bakuná. Dos siman pasá atrobe un pashènt ku Covid a drenta hòspital. Danki Dios awor akí e persona ei a sali for di hòspital. Esaki ta un atvertensia pa nos: kualke momentu COVID por ataká.

 

Nos tur sa ku e kantidat di kontagio na nos islanan ruman a subi hopi rápido. Te ku awor e biaha akí Boneiru no tabatin brote manera na Aruba i Kòrsou. Debí na e situashon na Aruba i Kòrsou, nos na Boneiru mester ta èkstra alerta. Nos tin te ainda e pa un gran parti e variante di dèlta ku ta hopi kontagioso. Si na Boneiru nos haña mesun kantidat grandi di kontagio, nos pashèntnan ku ta gravemente malu no por bai Aruba òf Kòrsou, nan mester bai  hòspital na un otro lugá. Hòspital ta yen na Aruba i Kòrsou.

P’esei ta bon pa por lo pronto nos sigui tuma medida pa evitá brote grandi na Boneiru.

Na mes momentu nos ta wak dilanti tambe: Nos ta wak kon bida ku Covid lo ta riba término mas largu. Nos ta spera ku e ora ei nos por biba un bida normal atrobe, kaminda nos ta keda tene kuenta ku Covid, meskos ku nos ta hasi ku e otro malesanan di infekshon manera dengue, chikungunya, grip etc. Den pasado nos a logra dominá malesanan di infekshon manera sarampi, roihun i kentura hel ku bakunashon. Nos ta spera ku riba tèrmino esaki ta e kaso ku COVID tambe.

Si nos wak futuro, e ora ei danki Dios tin algun kos ku ta na nos bentaha:

– Mayoria parti di nos poblashon ta konsiente ku ta importante pa tene nan mes e medidanan di corona. Huntu nos ta tene e vírùs bou di kontròl.

– Na Boneiru 81,7% di e grupo di enfoke di adulto a pasa angua, i 38% di e tinernan. 71.3% di e adultonan ta kompletamente bakuná i 24,8% di e tinernan. Te ainda kada siman algun shen persona ta pasa angua. Mas tantu hende pasa angua, mas chikitu e chèns ta ku lo bini un brote nobo. I lo no ta nesesario pa tuma mas medida.

Nos tin algu reto grandi nos dilanti. Nos ta kuminsá ku un aña eskolar nobo i nos ta habri  temporada di barku krusero ku koutela.  Nos por hasi esaki komo ku e sifranan di bakunashon ta haltu  i pasobra nos ta konsiente ku nos mester siña biba ku COVID. Awe ta e último biaha ku mi ta na konferensia di prensa komo bosero di departamento di Salubridat Públiko. For di promé di sèptèmber un kolega mas hóben, Loes Jaspers, ta tuma over. Mi ta deseá boso i nos tur un futuro bon i salú.

Share This
error: Content is protected !!