Si mi reakshon riba e un artíkulo den korant a kontribuí na reakshon i pone diputado sali trese punto di bista di Kolegio ehekutivo òf di su persona dilanti ta nifiká ku e atministrashon di Bonaire a faya. Algun punto: KIKO TABATA NEGATIVO I KEN TABATA NEGATIVO. Mi a trese dilanti ku henter e asuntu aki ta trata di mal gobernashon. Si un diputado bisa ku su man ta mará i un otro diputado bisa ku no ta embolbié den nada e konsekuensia, si bo te kere den demokrasia, tuma retiru. Si sinku konsehal ta sostené boso dal bai pero no papia bagamunderia. Den mi artíkulo mi a puntra si tabatin urgensia pa renobá e himno i si e renobashon ta útil i tin balor. No tin kontesta. Mi a mustra riba desaroyo di Bonaire kaminda e pueblo tin benefisio. Maske e mihó orkesta di mundu kambia e melodia no tin ningun benefisio pa pueblo. Nunka a trese dilanti kiko ta e idea, ken a bini ku e idea, pakiko tin ku mustra ku ta un ámtenar a firma si diputado ta esun responsabel.Ki nifikashon un dokumental tin. Kiko ta e realidat ku ta bini dilanti, kua tópiko ta di importansia pa pueblo. Laga mi ta mas konkreto. Mi ta bai entregá un proyekto pa renobá, pues skirbi di nobo istoria di Bonaire. Mi ta buska istoriadónan internashonal, mi ta buska skirbidónan di bon papiamentu , ingles, hulandes i spañó, mi ta buska personanan pa korigí, un imprenta di nòmber i ta bisa bo ku e proyekto ta 90 mil dòler. Mi no ta traha ningun dokumental, sino e ta bira 100 mil i ta defendé ku e suma ta barata mes. Nos ta bai skirbi tokante; kolonialismo, diskriminashon i  identidat. Diputado ta laga un ámtenar akordá? E proyekto aki ta na bienestar di pueblo pasobra e ta inkorporá den enseñansa. Ta enseñansa ku su maestronan ta prepará hende pa komunidat. Ta istoria ta e promé stap pa yega na sentido komun. Mi ke enfatisá ku ta un grupito ta monopolisá kultura i ku bendishon di e koalishon aki pa gana bòshi plaka. E asuntu di himno no a kaba.

Share This
error: Content is protected !!