Entrante djaluna 30 di ougustes, ku koperason di prensa boneriano, lo mi bai na trese ku regularidat mi pensamentunan tokante e derecho di eksistensia di sindikalismo na Boneiru komo e BOS di e trahadó den e desaroyo sosial ekonómiko di nos isla., Pa un mihó komprondementu di sindikalismo, mi ta opta pa kuminsá na trese dilanti algun punto kla i asina yuda tur trahadó komprondé e papel importante ku e klase trahadó tin i mester tin den e desaroyo di nos komunidat.
Desde su orígen e sindikalismo ta un movimiento ku ta buska pa kaba ku desigualdat, explotashon i opreshon imponé pa e sistema kapitalista y den aktualidat pa e kapitalismo salvahe òf neoliberalismo, ku ta pratiká eksklushon, desempleo, pobreza, miseria, desigualdat y negashon sistemátiko di e derechonan humano di e trahadónan i otro sektornan di e komunidat.
Pa sindikalismo por hunga su papel berdadero den e lucha aki i den defensa di interesnan di e trahadó, sindikalismo mester basa su fundeshi riba e siguiente prinsipionan.
·        Independensia di e Movimento Sindikal
·        Demokrasia sindikal
·        Solidaridat
·        Identidat di e klase trahadó
·        Pluralimo
·        Unidat di akshon
·        Unidat Sindikal
·        Aliansa ku otro sektornan sosial
Awe mi ta trata e tema independencia di e movimentu sindikal k uta konta pa Boneiru tambe. E ta dirigi no solamente pa dirigentenan pero mui en espesial pa e miembresia di tur sindikato, kende al fin i al kabo ta forma e sindikato. Mas mihó konosementu nan tin. Mihó nan sindikato ta funshoná na nan interés.
Independensia di partidonan  politiko.
·        Un sindikato ta un organisashon sosial ku ta sali na defensa di e klase trahadó. No mester konfundí e organisashon sindikal ku partidonan polítiko. Mester ta bon kla ku e lucha sindikal ta entre e opresor i esnan oprimí, entre e eksplotadónan i esnan eksplotá. Trahdónan no  ta organisá nan mes den un sindikato pa su ideologia, su kredo religioso  òf partido polítiko sino pa e kondishonnan komun di ta trahadó ku nan propio interés, Ta pesei den sindiklaismo no por tin deskriminashon a base di politika partidista, filosofía di relgion, ets
·        Sindikatonan mester komprondé ku un komunidat no ta dividí den partidonan politiko, sino den klasenan sosial ku ta buska un balansa pa por konvivi ku otro den un forma harmonioso i husto.
Independensia for di Iglesia
·        Den un sindikato por eksistí trahadónan ku diferente kreensha religioso. Komo defensor di derechonan humano mester respetá e libertat di kredo religioso di kada trahadó. E sindikato mester mantené su independensia for di iglesia i tene bon kuenta ku e lucha pa un mihó sosiedat tin prioridat den e bida aki..
·        Ora ta trata e tema aki, mester ta kuidadoso, ya ku iglesianan atraves di nan doktrina semper a hinka den mente di e trahadó ku nan mester resigná, nan mester tin pasenshi, nan mester ta konforme, nan mester ta obedesido ets. Esaki a konbertí hopi biaha e trahadó den un ser mansu pa akseptá e eksplotashon i ta stroba hopi biaha pa e trahadó eksigí kumplimentu ku su derechonan.

Independensia for di e dunadó di trabou.
·        Sindikatonan komo representante di trahadó no mester ta lantá ni dirgí pa ta den bon bista o boluntat di e dunadó di trabou. Nan ta organisá   i orientá pa nan mes i dor di nan mes.
·        Tin sindikato  ku ta influensiá pa e dunadó di trabou pa sirbi e interes di e duandó di trabou dor di kumpra e sindikalista ku fabornan o dunando nan sèn bou di mesa, promoshon den trabou pa perkurá ku nan no ta protestá kontgra inhustisia riba flur di trabou. Esaki tin komo uniko meta di stroba e sindikato sali na defensa di e derechonan di e trahadó pa mehorá nan kalidat di bida..
·        Si e dirigentenan no tin un konsenshi limpi ta hopi peligroso ku nan ta kai den e engañonan aki i ku ta pone ku nan ta traishoná e organisashon sindikal ora ku nan no ta rekonosé e strategia ku dunadó di trabou ta usa pa dividi i demobilisá e trahadó.

Independensia for di gobiernu
·        Mester ta kla ku den mayoría kaso e gobiernu ta representá e interés di e klase kapitalista, e empresarionan i e sektor finansiero.
·        Den un sosiedat repartí den klase e gobiernu ta e aparato ku ta ekspresá e interes di e klase ku ta doño di e medionan di produkshon. Ta e klase aki hopi biaha ta imponé pa gobiernu bin ku leinan ku ta kòrta den derecho sindikal i e derechonan di e klase trahadó, Independensia di e gobiernu ta nifiká ser vigilante riba e politika ku gobiernu ta hiba ku ta mishi i kòrta den derechonan di e trahadó i di e pueblo en general pa faboresé e empresarionan. E sindikato tin e deber di denunsiá e práktikanan aki.
·        Na Boneiru a lanta e sentral di sindikatonan USIBO netamente pa vigilá ku e derechonan di e trahadónan ta bon kuidá i pa no pèrmití ku ta abusá i eksplotá e trahadó i su famia. Ta p’esei USIBO a lucha ku éksito pa lanta e Diálogo Sentral den kua plataforma a duna e klase trahadó e bos grandi den e desaroyo sosial ekonomiko di Boneiru. Pa tal rason ta bon pa tur sindikato ta miembro di USIBO. No tin ningún motibu bálido pa un sindikato ta pafó di USIBO a ménos ku e ta sirbi otro interés ku no ta esun di e klase trahadó.

Share This
error: Content is protected !!