Tourism Corporation Bonaire (TCB) ta anunsiá ku riba 1 di sèptèmber 2021 e kurso duná dor di FORMA kual ta ‘Bonaire In-depth and Guiding skills’ lo kuminsá.

E kurso lo wòrdu duná 3 biaha pa siman di 8 ‘or di mainta pa 12 ‘or di merdia i lo dura 8 siman, kaminda ekspertonan di turismo lo duna e lèsnan ku lo kubri diferente topiko relevante tokante Boneiru i turismo. E kurso lo kubri topiko manera Boneiru su naturalesa, flora i fauna, kultura, historia, sostenibilidat, gobiernu i mas. Adishonalmente, e programa lo siña tekniká di guia i servisio pa bishitante.

E kurso aki ta spesialmente pa guia di rekorido i operadornan, shòfur, bendedonan, otro persona den industria di hospitalidat i otro personanan interesá pa sa mas tokante Boneiru. E preis pa e kurso di 8 siman ta $300 i ta inkluí instrukshonnan, buki, i ekskurshon. Partisipantenan lo ta terminá e kurso ku eksito dor di risibí un ‘intermediate certified certification’.

“Nos ta kontentu ku TCB por kolaborá ku FORMA pa kuminsa bèk ku e kurso aki. Boneiru su turismo ta demandá un nivel haltu di servisio i kalidat di informashon. Den kuadro di desaroyo di nos kapital humano, nos kier forma i inspirá nos profeshonalnan den sektor. Huntu nos por elevá nos konosementu i sigui pone Boneiru riba mapa mundial,“ Miles Mercera CEO di TCB a bisa.

Formulario pe registrá ta disponibel na TCB, Achie Tours i FORMA. Tambe riba e página di Facebook di FORMA.

Share This
error: Content is protected !!