KRALENDIJK- Gerensia di Selibon a pidi mediador di gobièrnu pa organisá un referendem pa
trahadónan di Selibon pa medio di votamentu disidí kua sindikato nos ta deseá pa
representá nos kondishonnan di trabou na Selibon. Nos tur sa pakiko nos a yega asina
leu ku e gran mayoria di trahadónan a disidí ku nos no ta miembro mas di ABVO i nos a
inskribí na AFBW. Boso tur sa kon a laga nos kompañera Suyen na kaya te e mes
mester a paga su abogado pa defendé su kaso. No lubidá kon nos eks kolega Emsley
tambe mester a paga su propio abogado pa gana su kaso. Asina nos por menshoná
mas kaso kon nos a keda para nos so sin ningun defensa di parti di ABVO. Ta basta
awor , nos tin derecho meskos ku tur trahadó na Boneiru pa uni nos mes den un bon
sindikato pa sali pa nos interesnan. Awe nos kier splika nos kompañeronan di trabou ku
nos a tuma nota ku tin un persona, mandá ku ta kana intimidá te hasta menasa trahadó
pa nan no vota pa bai un sindikato nobo. E loke ta hasi e kaso pió ku e mes ta kana
bisa ku ta un hende di den staf a mand’é bai papia ku trahadónan. Ki derecho e tin, e
persona aki ta Fèfè Raphaela ku ayera a drenta Selibon via polítika i awe kier bin
pretendé di sa kuantu nos ku tin 10, 20, 25 i 30 aña ta traha na Selibon a sufri.; Nos kier
pidi Fèfè pa keda leu for di nos lucha i stòp inmediato i laga kada ken ku nan libertat pa
skohe e sindikato ku nan kier ta miembro di dje. Dikon ora miembronan di Bon Lab a
bandoná ABVO no tabatin tin tur e bochincha aki. Ta kiko tin antó ku ta hasi tantu
beheit asina. Robert Sanchez no a bisa ku laga korotonan bai, e no a menasa nos ku
nos ta pèrdè nos “kerstbonus”, e la yama nos traidor, ets. Ta kon nos por sigui ta den
un sindikato ku ta kontra trahadó i ta na fabor di dunadó di trabou. Selibon su
trahadónan ta esnan di mas mal pagá na Boneiru. Nos kier bisa boso tur. Si dado kaso
abo sintibo intimidá o menasá yega i denunsiá esaki serka bo lidernan nobo, ku ta
Franklin Domacasse, Feliciano Wanga. Nos kier atvertí ku nos lo no basilá pa hiba e
denunsia nan aki mas leu i si ta nesesario te serka, Ministerio Públiko. E derecho di e
trahadó pa afiliá na e sindikato di su preferensia ta sagrado garantisá komo derecho
humano no na Boneiru so sino rònt mundu. Nos ke pidi tur trahadó di Selibon keda
alerta e dianan ku ta bin. Nos lo bai organisá anochi di informashon pa asina boso sa
ku serka AFBW nos lo para ariba pa e servisio ta garantisá. Nos ta trankil i nos ke pa
boso tambe ta trankil. Nos ta bai e referendem aki ku un kurason trankil. Nos lucha ta
hustu, nos lucha ta ku un solo meta, esta defendé nos derechonan. Finalmente nos kier
pidi gerensia di Selibon, si boso ke berdaderamente pas laboral riba tereno di Selibon,
nos tin un súplika. Ni dirèkt ni indirekto no intimidá i menasá e trahadónan. Bieunan ta
bisa. Si bo no ke tin pleitu ku lagadishi, no planta bonchi kant’i trankera. Laga e
referendum tuma lugá i laga pa trahadónan disidí kua sindikato nan kier pa ta nan
representante legal na Selibon.

Share This
error: Content is protected !!