KRALENDIJK– Den kuadro di Luna Mundial di Alzheimer Fundashon Alzheimer Bonaire ta presentá dia 21 di sèptèmber próksimo e pelíkula “WEI” ku koperashon di Wimpy’s Sound & Images den sala di konferensia Piet Mondriaan na Courtyard Marriott Resort.

 

“WEI” ta un dokumentario di Ruud Lenssen den kual e ta presentá e trayekto di demensia i kuido di famia di su mayornan. Tata Jac a krea su mes paradeis chikitu: un pida tera di 1 hèktar den naturalesa ku kabai, galiña i un hòfi ku bèrdura i fruta.

Jac ta enkantá ku su trabou den e kunuku i ta determiná pa sigui kuid’é. Lástimamente nèt awor ta konstatá ku Jac tin demensia, pero naturalesa i su bestianan ta duna Jac konsuelo i seguridat den su mundu ku pokopoko a kuminsá ta bruha.

 

Ku tristesa mama Ria ta mira kon Jac ta bayendo atras. Preokupashon pa su kasá ta bira kada dia mas i mas i esaki ta kuminsá eksigí mas di dje mes tambe.

Su sintimentu di amor i kuido ku kariño vários biaha ta kambia den frustashon i soledat. No opstante esaki e ke sigui kuida Jac mas tantu ku por, na kas.

Pero miéntras Jac ta purba tene duru na su paradeis, tòg no por evitá ku dia pa dia e despedida ta yega serka.

 

“WEI” no ta solamente un pelíkula tokante demensia i “mantelzorg” pero alabes un historia yen di amor tokante kon lihé bida por para kambia.

 

Ku nominashon i distinshonnan for di 2019, programanan di televishon i Festivalnan  di sine na Hulanda/Europa i tambe na USA/VS ta di rekomendá kòrdialmente pa mira e pelíkula aki.

Fundashon Alzheimer Bonaire ke selebrá Dia di Alzheimer ku e pelíkula aki pa asina ofresé interesadonan e oportunidat pa mira e pelikula pa US$ 12,50. Komo apresio ta regalá un T-shirt koló hel ku e tema di 2021 esta: “Konosé Demensia, konosé Alzheimer”.

 

Karchi pa entrada ta optenibel serka miembronan di direktiva i boluntarionan di Fundashon Alzheimer Bonaire.

Direktiva di Fundashon Alzheimer Bonaire ta konta ku bo presensia i sostén, pero tene kuenta ku ta sierto kantidat di lugá ta disponibel. Pues pura kumpra bo karchi!

 

Mashá danki pa bo koperashon i sostén.

Bulevar Gobernador Nicolaas Debrot #74 Tel +599 780 0120 e-mail: info@alzheimer-bonaire.com www.alzheimer-bonaire.com

Facebook: Fundashon Alzheimer Bonaire. KvKnr.:  7787.   Banko di Caribe: #308 437 01

Share This
error: Content is protected !!