Den 2020 tabatin 11.5 mil hende na trabou aki na Boneiru. E trabounan ta repartí den diferente sektor. Pa loke ta e sektor di turismo, nos por repartí esaki den hotel, restorant, transporte(taksi i tour), agensianan di biahe ets. Banda di esaki nos konosé e sektor di konstrukshon, ku ta un sektor hopi grandi. Otro sektornan di importansia den nos komunidat ta e sektornan di vigilansia, komersio(tienda i pakusnan), nos krèchenan, pero tambe garashinan. Un sektor ku tambe ta kresiendo ta esun di kriamentu di mata. Informashon ku nos ta disponé di dje ta indiká ku e gran mayoria di trahadónan den e sektornan menshoná no ta organisá. Esaki por enserá ku trahadónan den e sektornan aki no ta konsiente di leinan ku ta aplikabel pa nan i ku e dunadó di trabou mester kumpli kuné. Pa falta di e konosementu aki por sosodé ku trahadónan ta keda eksplotá na trabou sin ku nan tin un defensa kontra e abuzonan aki.
E lei ku ta regla hopi asuntu tokante labor ta e Lei di Labor 2000. Pero fuera di e lei aki, tin diferente otro leinan ku sindikalismo ta na altura di dje i ku nan por hasi uzo di nan, ora ta trata algu spesífiko ku ta toka e trahadó. Asina nos konosé:
–        Lei di trabou pa imigrantenan BES.
–        Lei di seguridat na trabou
–        Lei di stuwadoor
–        Lei di sesantia
–        Lei di penshun di báhes
–        Lei di biudo(a) i huerfano
–        Lei di malesa
–        Lei di desgrasia
–        Lei di fakashon
–        Lei di terminashon di trabou
–        Lei di sueldo minimo
–        Lei di ònderstant
Inspektornan di labor ku ta traha na departamentu di Labor i asuntunan Sosial ta enkargá ku mantenshon i supervishon di e leinan aki. Trahadónan ku ta organisá den un sindikato semper por buska ayudo o konseho riba e leinan aki serka nan delegadonan òf via nan delegadonan serka nan sindikato. E  sindikato si e mes no tin  ekpertisio den kas semper por buska ayudo hurídiko serka un eksperto den e leinan laboral òf por aserká direktamente e departamentu di Labor i Asuntunan Sosial pa informashon. Esaki ta un di e servisionan ku komo miembro di un sindikato bo tin derecho riba dje. Pues asistensia hurídiko riba tereno laboral ta un di e servisionan ku bo ta haña pa e kontribushon ku bo ta paga mensualmente pa ta miembro di un sindikato. Tambe e sindikato atraves di kursonan di formashon lo bai na duna su miembronan di direktiva, su delegadonan i e miembronan interesá kursonan riba e leinan aki di moda ku trahadó mes tambe ta haña konosementu di su derechonan ankrá den e leinan aki i asina e mes ta bira mas fuerte na trabou i por evitá ku ta kometé abuso kontra di dje.
Den kuadro di e servisio aki, un di  puntonan di enfoke pa realisá, USIBO a pone den su programa un “set-up” di loke nos a yama un bentana di asistensia pa tur trahadó/miembro i nan famia pero tambe pa e pueblo en general. Opviamente si bo ta miembro bo tin probecho di e sevisio aki i si mes tin gastu mará na dje, komo miembro lo bo haña un “fee” preferenshal. Pues e ta un estímulo pa komo trahadó bo ta miembro di un sindikato, ya ku banda di e servisio aki, nos lo bai trese na bo konosementu mas servisio ku sindikato lo bai ofresé na su miembresia.
Pa realisá e servisio aki den e forma mas optimal, sindikatonan na Boneru mester realisá i aktua den solidaridat i unidat di akshon. Esaki ta dos di e prinsipionan básiko ku mi a elaborá riba dje den e kolumnanan anterior. Usando e prinsipionan aki sin distinkshon di rasa, nashonalidat, religion, politika, desendensia, status sosial o ekonómiko i/o posishon den trabou, nos lo hasi e bos di trahadó mas fuerte i nos lo konstruí un mihó sosiedat kaminda nos lucha kontinuo lo ta HUSTISIA pa Un i Tur i un eksistensia humano i ku rèspèt pa dignidat humano. Ta na nos pa huntu konstruí e sosiedat ei pa nos mes pero tambe pa nos futuro generashonnan.

Share This
error: Content is protected !!