Siman pasa delegadonan di USIBO (Union di sindikatonan Boneriano) tabata na Aruba pa un kongreso di FTA i a probechá firma dos protokòl di koperashon ku dos sindikato na Aruba.

Protokòl di koperashon entre USIBO i SIMAR.

USIBO i SIMAR a yega na e konklushon pa sera un protokòl di koperashon entre e dos partidonan aki pa den solidaridat i union yuda otro, sostené otro i fortifiká otro ku e propósito pa, hasi uzo di tur konosementu, eksperensha i fasilidatnan, sali den un forma optimal pa e klase trahadó riba e teritorionan di Aruba i di Boneiru en partikular. Mester realisá i aktua den solidaridat i unidat di akshon. Ku e koperashon aki sindikatonan ta mas fuerte pa nan miembronan i mas fuerte trahadónan ta, nos lo konstruí un mihó sosiedat kaminda nos lucha kontinuo lo ta HUSTISIA pa Un i Tur i un eksistensia humano i ku rèspèt pa dignidat humano.

Pa USIBO a firma presidente, sra. Mavis Abrahams i pa SIMAR a firma sra. Josephine Albertus.

Protokòl di koperashon entre USIBO i FTA.

Despues  di kulminashon di e di XXIV kongreso konstitushonal, Union Sindikal di Boneriano (USIBO) i Federacion di Trahadornan di Aruba (FTA) a bini huntu pa firma un protokòl di koperashon entre e organisashonnan.

Interkambio di informashon, konosementu i eksperensia ta di vital importansia pa progreso di sindikalismo den nos region. Pa e motibu aki tambe e organisashon nan sindikal, a hasi uso di e oportunidat di ta huntu na Aruba, pa formalisá e koperashon, un koperashon ku ta eksistí ya kaba pa algun aña.

Pa FTA a firma sr. Hose Figaroa kende a wòrdu eligí komo presidente dia 17 sèptèmber último i pa USIBO a firma presidente, sra. Mavis Abrahams.

Share This
error: Content is protected !!