Djadumingo 26 di sèptèmber Xtreme Sports Bonaire patrosiná pa Brandaris administratie kantoor ta organisá e di 11 Duo Xtreme Mountain bike race na Boneiru. E kareda aki meskos ku 2 aña pasá lo tin dos kategoría di 55km (pro) i Xtreme di 73km ku ta duna oportunidat pa siklista di diferente nivel por partisipá. Ta spera bastante koredó pa e evento aki ku varios bishitante di otro isla i paísnan. Te na e momento aki di Korsow tin mas ku 50 siklista ku a konfirmá nan partisipashon den e kareda aki ku ta kresiendo tur aña. Otronan tambe ku a konfirmá ta di Merka, Hulanda i Aruba. Tur esaki sin inkluí nos mes siklistanan na Boneiru ku ta den full treining pa e evento aki.

E kareda lo pasa den diferente área ront di e isla usando kamindanan den mondi i ku subida i bahada den serunan, E reto aki ta prinsipalmente pa pasa luganan hopi stèil ku baiskel manera entre otro seroe largu i hopi kaminda alehá. Tambe lo tin trayektonan largu i den e solo kayente den e díanan aki lo ta un reto pa kompetí. Lo tin varios kamindanan difisil pa pasa ku ta hasi e kareda mas interesante pa e koredó.

E kareda ta konta ku koperashon di polis lokal i Krus Korá i tambe boluntarionan pa asina sigurá e protekshon di e partisipantenan den kaso di un aksidente.

E kareda lo kuminsá djadumingu mainta 6.30 saliendo for di Eden Beach Resort direkshon aeropuerto i asina krusa su tras bai kaminda Sorobon, Jatu Baku, Washikemba i Lagun i asina pasa den diferente área den mondi ront di Boneiru manera Bolivia, Trai Montaña, Rincon i Sabadeco pa menshoná algún. E final lo ta na Eden Beach Resort.

Durante henter e ruta lo tin 5 post di awa (Heaven) i energy drink ku boluntarionan pa asistí e partisipantenan pa refreská un tiki i yuda si mester, i otro 5 post mas pa kontrolá e kareda i tambe vigilá e trafiko di òuto pa seguridat.

Kada tim ta konsistí di dos partisipante ku ta kore huntu i mester kaba ful e kareda pa por klasifiká den premio. E edat mínimo pa partisipá ta 16 aña. Tin diferente kategoría ku por partisipá aden manera Junior, Senior (edat kombiná di 100 aña entre 2), Mixed, Hòmber i Damas.

Tur finalista ta risibí un medaya di partisipashon. E ganadornan di e kategoría prinsipal lo gana premio kèsh ku ta varia entre $400 pa e tim ku gana, $200 di dos lugá y $100 pa e team ku yega na di tres lugá. Tambe tin trofeo pa e promé 3 finalista den tur kategoría.

Entrega di premio lo tuma lugar djadumingu merdía na Eden Beach durante di e lunch pa tur partisipante. Mas ku 40 boluntario mas asistensia di kuerpo polisial lo juda den e evento aki ku kada aña ta kresiendo.

Djabierne atardi 5or lo tin e promé inskripshon na Karel’s Beach Bar i ta spera pa tur por pasa mira e ambiente i hasi konosí ku e partisipante nan. Preis pa partisipante ta $25.

E evento aki tin komo sponser prinsipal Brandaris BV huntu ku Eden Beach Resorts, Sunbelt Realty, MegaFM, De Freewieler, Freixenet,  Napa, Budget Carrental, Karel’s Beach Bar, Bonaire Office Systems, Gaia Pro i Bonaire Logistics ku a yuda kontribuí pa hasi e kareda aki posibel i eksitoso.

 

Pa informashon:

Mocky Arends +599 7865614

Frank Bohm +599 7778545

Neil van Wilgen +599 7770117

Ronald Schleper +599 7853902

 

Of por kontaktá via Info@bonairextreme.com of nos wepsait www.bonairextreme.com . Tambe por haña tur informashon via nos página di Facebook

 

Share This
error: Content is protected !!