Luna di Alzheimer Mundial, sèptèmber 2021 tin komo tema” Konosé Demensia, Konosé
Alzheimer” i den kuadro di e tema aki Fundashon Alzheimer Bonaire tabata hopi aktivo durante
fin di siman i por mira atras riba dos aktividat hopi eksitoso komo parti di su programa di
sèptèmber.
Djabièrnè 17 di sèptèmber sra Henriëtte Thoonen, kònsùltent di kuido di famia i sra Marjon
Roos, terapeuta di muzik, ámbos di Kòrsou a trese un charla interesante ku e tema ”Kiko ta
kuido di famia & Sostén pa duna kuido” den sala di konferensia di Captain Don’s Habitat.
Komo ku tantu direktiva di Fundashon Alzheimer Bonaire komo Captain Don’s Habitat mester a
atené nan na e reglanan vigente di Corona, e kantidat di lugá disponibel tabata limitá i lástimamente direktiva no por a permití mas interesado asistí na e charla.
E presentenan tabata hopi satisfecho ku nan por a partisipá na e presentashon i na final nan a
ekspresá nan gratitut na e oradornan i direktiva. Riba e pòrtrèt por mira e presentenan durante
e charla.
Djasabra 18 di sèptèmber e mésun oradornan, sra Thoonen i sra Roos a tene 2 seshon di tayér
pa personal di kuido di tur e instansianan di kuido na Bonaire. E tema tabata “Sostén pa
dunadónan di kuido na Bonaire”. Despues di e tayernan ámbos grupo a risibí un sertifikado. E
partisipante-nan tabata hopi agradesido pa e oportunidat ku a duna nan i ta spera ku ta bini
mas tayer. Riba pòrtrèt por mira e dos gruponan ku nan sertifikado den presensia di vicepresidente di Fundashon Alzheimer Bonaire, sra Henna Winklaar i e oradornan.
Djamars 21 di sèptèmber, Dia di Alzheimer e siguiente aktividat a tuma lugá, esta e pelíkula
WEI, pero pa motibu ku mester a tene kuenta ku e reglanan di Corona e lugánan tabata limitá,
di manera ku lástimamente no por a permití hopi mas interesado gosa di e pelíkula tan balioso
aki. Pero entretanto direktiva ta trahando riba un pronto ripitishon.

Share This
error: Content is protected !!