Entrante promé di òktober 2021 Instituto Hudisial Hulanda Karibense (JICN) ta introdusí e asina yamá kamber di famia (familiekamer) pa detenido por risibí bishita di famia. E espasio aki ta hasi bishita den un esfera doméstiko posibel pa detenido i su famia ku ta kumpli ku kriterionan stipulá.

E kamber di famia ta un espasio den JICN spesialmente ekipá kaminda detenido por risibí bishita di famia sin tin un skòt entre nan. Intenshon di e fasilidat ta pa detenido por mantené relashon ku su famia i spesialmente su yu(nan) na un mihó manera. Mantené relashon ku famia i sernan kerí ta un aspekto importante den e proseso di reintegrashon, kaminda ta prepará detenido pa regresá den komunidat.

Bishita den kamber di famia no ta un derecho pero un fabor pa solamente detenido ku ta kumpli ku kriterionan estrikto stipulá. Por ehèmpel e detenido por hasi petishon pa hasi uso di e kamber di famia despues di seis luna di su detenshon i solamente si su komportashon den e instituto ta di deseá.

Un detenido por risibí bishita den e kamber di famia riba orarionan stipulá i por risibí te ku tres miembro di famia pareu. Bou di supervishon indirekto di un trahadó di JICN e detenido por pasa un ora ku su famia. Lo informá e bishitantenan tokante reglanan ku ta na vigor durante bishita den e kamber di famia, promé ku e bishita kuminsá.

Introdukshon di e kamber di famia ta un paso nobo den maneho di Detenshon i Reintegrashon (D&R) di JICN. Dor di stimulá i rekompensá komportashon deseá serka detenido i straf mal komportashon, ta motivá detenido pa lucha pa nan reintegrashon mas mihó posibel pa asina redusí e chèns di residivismo.

Share This
error: Content is protected !!