Tourism Corporation Bonaire (TCB) a organisá un evento na Captain Don’s Habitat pa lansa e di 3 Buki di Turismo i pa anunsiá e ganadornan di e kompetensia eskolar ‘Boneiru Eksperensia Outéntiko ku Arte 100% Resiklá’.

Tabata un atardi plasentero den presensia di diputado di enseñansa Nina den Heyer, CEO di TCB Miles Mercera, outor i editor Denise de Jong-Rekwest, ganadornan, mayornan, wéspetnan di honor i e Tim di TCB. E di tres título di e Buki di Turismo ta ‘Turismo na Boneiru, Eksperensia Outéntiko’.  Esaki ta dediká na e eksperensianan outéntiko di Boneiru, inkluso su historia, flora i founa, aktividatnan i hopi mas. Un biaha mas un publikashon edukativo yen di informashon esensial tokante nos isla.

E di tres Buki di Turismo titulá ‘Turismo na Boneiru, Eksperensia Outéntiko’ ta forma parti di e plan di enbolbimentu sosial di TCB. Enfoke di TCB ta pa inkorporá turismo komo parti di e programanan edukativo na nos skolnan lokal. Segun CEO di TCB, Miles Mercera: “Nos ta orguyoso di nos tim i e koperashon ku nos stakeholdernan edukativo ku a hasi e proyekto importante akí bira realidat. No ta solamente importante, pero ta un responsabilidat di nos tur tambe pa sòru ku turismo ta forma parti di e programa di enseñansa na nos skolnan. Nos ta dependé di nos hóbennan di futuro pa keda inspirá i forma parti di e industria mas dinámiko di nos isla.”

Durante e evento akí e ganadornan di e kompetensia eskolar ku a tuma lugá entre muchanan di skol básiko tambe tabata presente. TCB a anunsiá e ganadornan i tambe a entregá e premionan. E ganadornan di e kompetensia di aña 2021 ta:

Grupo 6: Ganador: Deavion Ottenhoff – Kolegio San Luis Bertran / Promé lugá: Yneesha Abad – Kolegio San Luis Bertran / Di dos lugá: Simonee Sint Jago – Kolegio San Luis Bertran

 

Grupo 7: Ganador: Shemar Asencion – Kolegio San Luis Bertran / Promé lugá: Yordi Bransban – Rayo di Solo / Di dos lugá: Seleron Melaan – Rayo di Solo

 

Grupo 7: Ganador: Angel Julio Rodriguez – Rayo di Solo / Promé lugá: Kirlivienska Janga – Rayo di Solo / Di dos lugá: Aydon Fernandez Winklaar – Rayo di Solo

 

Grupo 8: Ganador: Suvianthy Kroon – Kolegio San Luis Bertran / Promé lugá: Kiyaya Kroon – Kolegio San Luis Bertran / Di dos lugá: Rosheena Sint Jago – Kolegio San Luis Bertran

 

Arte espektakular: Ganador: Kolegio Rayo di Solo – Yùfrou Jubella Balentin / Promé lugá: Kolegio San Luis Bertran – Yùfrou Marjolijn Kroon

Tambe TCB a duna honor na Emeesha Jansen komo Embahadora di Boneiru pa motibu ku el a gana e título Little Nuestra Belleza International 2021 durante e kompetensia na Punta Cana, República Dominicana.

Share This
error: Content is protected !!