KRALENDIJK – Fundashon Históriko Kultural Boneriano (FuHiKuBo) a firma un kombenio pa logra mantené herensia i patrimonio kultural di Boneiru. FuHiKuBo pa añanan kaba ta buskando un alohamentu apropiá pa warda su kolekshon, miéntras ku Stichting Cocari II pa medio di e akuerdo aki gustosamente ke hasi uso di e konosementu kultural-históriko di FuHiKuBo i Bòi Antoin.

Evert Piar, presidente di e konseho di supervishon di Stichting Cocari II, a bisa ku komo fundashon na promé lugá nan ta desaroyadó di un proyekto. Manera a sosodé ku Pasadia Cocari na Rincon. I awor e kas di frater patras di misa San Bernardo na Playa.

“Nos a ripará ku no solamente bo mester tin idea di konstruí i kon tabata traha edifisio ántes, pero bo mester sa tambe historia di e edifisionan konserní. Tambe mester por disponé di material visual pa yega na restorashon responsabel. Asina semper bai nos a yega serka Bòi Antoin di FuHiKuBo. I FuHiKuBo un biaha tabatin pregunta pa nos ku si nos via di nos ret por yuda ku alohamentu pa nan kolekshon. Pues ya nos tabata den kombersashon regular ku otro,” Evert Piar a bisa.

Pero, Piar a sigui bisa, tabata diputado Nina den Heyer, kende a konsehá nos pa traha mas huntu i tabatin rason den esaki. Dos sa mas ku unu i sigur riba un isla manera Boneiru koperashon pa un asuntu ta bon i lógiko. Pues awe ta un dia bunita pa nos i e herensia kultural na Boneiru.
Diputado den Heyer: “Mi ta haña e koperashon aki i asuntu hopi bon. Asina bo ta konta tur esfuerso i konosementu huntu i ta evitá pa traha banda di otro. Si di e manera aki bo ta mira i aserká asuntunan integral, nos por pone nos medionan públiko efisientemente i optimal den otro i ei nan nos tur tin benefisio.”
Cocari aktualmente ta desaroyá un proyekto bunita tras di Misa di Playa i FuHiKuBo ta bai skirbi un bunita buki di historia tokante esaki. Asina ta konservá nos kultura i historia pa nos yunan. Ku esaki ya por felisitá e partidonan, segun diputado den Heyer.

“Aparte di esei e lokalidat patras di Misa San Bernardo ta un sitio bunita pa nos biblioteka públiko i tambe pa e archivo di FuHiKuBo. Pero na mes momentu laga mi ta kla. Tur esaki ainda no ta sigur. Hopi ta dependé di e sosten for di Den Haag. P’esei otro siman mi ta bai bishitá e minister di OCW pa splik’é un biaha mas ku realmente algu mester sosodé. Nos so no por kumpli ku e enkargo aki. Nos biblioteka aktualmente ta alohá den un anterior supermarket. Pa ta eksakto, den e parti di karni di e anterior supermarket. Esaki naturalmente mester ta otro. Meskos ku enseñansa, mas lihé posibel huntu ku Den Haag ke trese e kalidat di nos biblioteka na un nivel igualabel ku Hulanda Europeo,” diputado den Heyer a bisa.

Na 2015 na Hulanda a implementá Wsop, pero seis aña despues ainda e trabou di biblioteka no ta kumpli ku e lei. For di 2010 ya nos biblioteka tabatin retraso. Pues en todo kaso no por papia di un maneho nobo, pero di un rekuperashon dòbel nesesario pa eliminá e retraso.

Den Heyer: “Un biaha mas lo mi invitá e minister pa bishitá Boneiru i aki nan, meskos ku e parlamentarionan, ku propio wowo por mira ku te ainda tin retraso pa eliminá i tambe pidi su atenshon pa konservashon di nos herensia kultural.”

 

Share This
error: Content is protected !!