UN MAS DETENSHON DURANTE ENTRADA HUDISIAL EN KONEKSHON KU ATRAKONAN RESIEN
Riba djabièrnè 24 di sèptèmber, den oranan trempan di mainta a tene dos entrada hudisial en konekshon ku e último dos atrakonan ku a tuma lugá resientemente. Un tabata na un kas situá na Rincon kaminda a detené un hòmber di inisial B.A.Q.A. di 27 aña di edat i tambe a konfiská algun artíkulo pa investigashon. E otro entrada tabata na un kas situá na Nikiboko. Investigashon den e kaso ta siguí.

DAMA TA KAI FOR DI SKUTER
Riba djaweps 23 di sèptèmber, alrededor di 6.45 or di atardi, ambulans a transportáshofùr di un skuter pa hospital pa tratamentu médiko despues ku el a kai for di skuter. El a deklará ku un outo ku tabata koriendo su dilanti a wanta brek diripiente, dor di kua e tambe mester a wanta brek diripiente, pèrdè kontrol riba su stür i a kai.

AKSIDENTE ENTRE OUTO I SKUTER
Alrededor di 11.30 or riba djaweps 23 di sèptèmber, un aksidente entre un outo i un skuter a tuma lugá riba Kaya Carlos A. Nicolaas. E outo ku tabata biniendo for di den un hanchi no a mira e skuter ta bin a bai dal den dje. Personal di ambulans a atendé ku shofùr di e skuter na e sitio mes i e no mester a bai hospital. Despues di kòntròl mas aleu a bin resultá ku e shofùr no tabatin reibeweis ni papel di seguro. A hiba e skuter warda i e shofùr a haña un prosèsferbal pa manehá si reibeweis i sin seguro.

A KONFISKÁ BRÒMER I SKUTER
Riba djárason 22 di sèptèmber a konfiská un bròmerdespues ku a para e shofùr pa kòntròl komo ku e no tabatin hèlm bisti. Despues di kòntròl mas aleu a resultá ku e shofùr no tabatin reibeweis i ku e bròmer no tabata sigurá. A konfiská e bròmer. Por buska esaki na momentu ku por mustra e dokumentunan menshonábálido. E shofùr a haña un prosèsferbal pa manehá sin hèlm bisti, sin reibeweis i sin seguro.

Riba djaluna 20 di sèptèmber tambe a para un skuter pa kòntròl komo ku e tabatin un plachi di number bieu. Despues di kòntròl mas aleu a resultá ku e shofùr no tabatin reibeweis ni seguro. A konfiská e skuter te ora e shofùr por mustra e dokumentu nan menshoná.

MOLÈSTER DI HUMA DOR DI SUSHI NA KANDELA
Den oranan di atardi riba djárason 22 di sèptèmber, un patruya ku tabata patruyando riba Kaya Nikiboko Nort a nota hopi huma den direkshon nort. Na yegada na un kunuku den e direkshon ei, a rebultá ku ta sushi tabata na kandela riba un tereno i esaki tabataprodusiendo hopi huma. Brantwer a bin na e sitio i a paga e kandela. No tabatin niun hende na e kunuku.

LADRONISIA NA KOMPANIA DI KONSTRUKSHON
Riba djamars 21 di sèptèmber a drenta keho di ladronisia na un kompania di konstrukshon situá na Kaya Gobernador Nicolaas Debrot. Malechornan a bai ku algun stal dikonstrukshon despues di ora di trabou. Ta investigando e kaso.

AKSIDENTE ENTRE DOS OUTO
Alrededor di 6 or di mainta un aksidente entre dos outo a tuma lugá riba Kaya Korona. Ambulans a transportáshofùr di un di e outonan pa hospital pa tratamentu médiko. A konsekuensia di e aksidente tabatin zeta riba kaminda. A informá e departamentu konserní di OLB i nan a sòru pa a limpia e kaminda.

LADRONISIA DI ARTÍKULONAN PA SAMBUYÁ
Riba djaluna 20 di sèptèmber a drenta keho di ladronisia di entreotro un brel pa sambuyá di marka Mares, un di brel pa sambuyá di marka Aqualung i sapatu pa sambuyá di marka Mares. E artíkulonan tabata pone pa seka riba pòrch di un apartamentu di un kompleho di apartamentu situá na Kaya Sirena. Entre djamars 14 di sèptèmber i djárason 15 di sèptèmberdeskonosínan a bai ku e artíkulonan. e kaso ta bou di investigashon.

DETENSHON PA MENASA
Den oranan di anochi riba djadumingu 19 di sèptèmber a detené un hòmber di inisial E.M.C. di 44 aña di edat na Hanchi Amboina en konekshon ku menasa ku un arma.

LADRONISIA DI SKUTER
Riba djadumingu 19 di sèptèmber a drenta keho di ladronisia di un skuter kolo shinishi di marka Kymco, modèl Agility, numerá MF-2876. Entre djasabra 18 di sèptèmber i djadumingu 19 i sèptèmber, deskonosínan a bai ku e skuter. E skuter tabata stashoná den kura di un kas situá na Bulevar Julio A. Abraham i tabata na lo ku un lòk di stür. Ta investigando e kaso.

Riba e mesun dia a drenta un keho mas di ladronisia di un skuter kolo shinishi di marka Kymco, numerá MF-2004. E skuter tabata stashoná, na lòk, dilanti di un kas situá na Kaya Cauca. Entre djasabra 18 di sèptèmber i djadumingu 19 di sèptèmberdeskonosínan a bai ku e skuter.

DETENSHON
Riba djadumingu 19 di sèptèmber, alrededor di 2 or di mardugá a detené un hòmber di inisial A.J.M. di 43 aña di edat. E sospechoso tabata shofùr di un pikòp ku tabata buta ‘fever’ durante ku un patruya tabata besig ku un kòntròl den Centrumgebied. Polis a purba blòkia e outo pero no a logra. Mesora a sigui un persekushon kòrtiku. A logra para e shofùr i a dun’eòrdu algun biaha pa baha for di e outo. E no a kumpli ku e òrdunan aki imester a sake for di den e outo. A detené en konekshon ku resistensia kontra un ámtenar den funshon, pa no kumpli ku òrdu di un ámtenar den funshon i pa kousa peliger/estorbo riba kaminda públiko deliberadamente.

A detené dos hòmber despues di aksidente
Riba djasabra 18 di sèptèmber a detené dos hòmber na Kaya Sonmontuno despues ku nan tabata pleita despues di un aksidente den kua tur dos tabata enbolbí. Ta trata di e hòmbernan di inisial M.R.B.A. di 47 aña i J.C.N.A. di 51 aña. A detené nan en konekshon ku resistensia kontra un ámtenar den funshon i pa no kumpli ku òrdu di un ámtenar den funshon.

PIKÒP NA KANDELA
Riba djasabra 18 di sèptèmber sentral di polis a risibí notifikashon tokante un pikòp na kandela den besindario di Tanki Maraka. E shofùr a deklará ku el a kaba kue gasolin. Miéntras e tabata koriendo huma a kuminsá sali for di bou di tapa di mashin di e pikòp. Mesora el a para e pikòp i djis un ratu despues hinter e pikòp tabata na kandela. Brantwer a paga e kandela. No tabatin herido.

Share This
error: Content is protected !!