Riba e fecha ku Larry Thomas ta hasi 1 aña di fayesimentu, Servisio di Belasting Boneiru a inougurá su sala di resepshon den ofisina di Belasting komo Sala di Resepshon Larry Thomas na memoria di su empleado defuntu. E inougurashon a tuma lugá den presensia di algun kolega di Larry Thomas huntu ku nan direktor sra. Johannavan den Breemer, sra. Carla de Conink di RCN, su famia mas yegá, i direktiva di Fundashon Nawati. E idea pa a duna e sala di resepshon nòmber di Larry Thomas a sali di direktiva di Fundashon Nawati ku di e forma akí, ke a kontribuí na honra Larry pa su manera di atendé ku kliente di Belastingdienst na un forma amabel, simpel, korekto i sumamente servisial. Esaki a krea e imágen na Belasting ku Larry tabata kara di e servisio ku nan resepshon tabata duna, i awor ku e no ta na e mundu akí e sala di resepshon a haña su nòmber. Larry su tata Hubert (Yubi) Thomas huntu ku presidente di Nawati Hubert Vis a desvelá na e inougurashon akí un plaka di memoria ku ta bisa ku ta Sala di Resepshon Larry Thomas.

Na e mesun okashon sra. Johannavan den Breemer a inougurá un plaka di memoria, ku a haña un lugá na e bali di pòrtir, pa sr. Luis Gijsbertha kende a traha ei komo pòrtir/bewaker i tambe a fayesé den un lapso di tempu kòrtiku despues di Larry Thomas, aña pasá.

Fundashon Nawati ta kontentu i agradesido ku Servisio di Belasting a akseptá su proposishon pa yega na duna e sala di resepshon nòmber di Larry, na su memoria. Nawati ta orguyoso ku ta trata di un norteño ehemplar den su trabou kende a mustra kon pa hasi pa yuda krea i mantené un komunidat dushi na Boneiru.

Share This
error: Content is protected !!