KRALENDIJK — Ku tur forsa mester desaprobá manipulashon den sindikalismo. Mas i mas sierto sindikalistanan, te asina leu ku por yama nan sindikalista ta praktikando e mes un armanan di represaya, intimidashon i manipulashon ku hopi dunadó di trabou ta usa pa dominá i tene trahadó den nan gara. Den un estado di derecho demokrátiko i den un organisashon di trahadó e fundeshi ta miembresia. Ta pa nan ta lanta e sindikato, ta pa nan e sindikato mester sali, ta pa nan e sindikato mester defendé nan interesnan na mesa dilanti e dunadó di trabou i ta pa nan e sindikato mester sali dilanti di kualkier gobièrnu pa esaki traha leinan ku ta protehá e dignidat di e trahadó i komo hende. Den un palabra tantu e sindikato komo e lidernan sindikal mester ta na SERVISIO di e trahadónan/miembro i nan famia. I na momento ku e tahadó, pagadó di kontribushon sinti i eksperenshá ku e sindikato i e lidernan ku e la vota pe ta den funshon di dirigente no ta sirbi sufisientemente o no ta sirbié ètòl su interesnan komo trahadó e trahadó/miembro tin tur derecho di reklamá i si ta nesesario akshoná. Mas pió e situashon ta bira ora e trahadó sinti e eksperenshá ku e sindikato i su lidernan ta lèn na banda di e dunadó di trabou, e ora ei su reklamo o akshon ta bira mas nesesario. Si yega asina leu ku e trahadónan ta tuma e desishon ku nan no tin konfiansa mas den nan lidernan sindikal i e sindikato, antó den nos estado di derecho demokrátiko ta nan so tin e poder di desafiliá for di e sindikato i sea lanta nan propio organisashon sindikal òf buska afiliashon na un otro sindikato. I si yega asina leu tur hende, esta direktiva di sindikato, gerensia di e kompania i kompañero(a)nan di trabou mester respetá e desishon ei PUNTO.

Den kaso di SELIBON, mester konstatá ku (in)direktamente e direktiva di e sindikato i/o ku nan konosementu sierto miembronan di e direktiva ta praktikando intimidashon i manipulashon kontra e grupo di trahadónan ku den nan mayoria a duna di konosé ku nan no kier ta miembro mas di ABVO i ku a pone ku gerensia di Selibon a pidi manera lei ta preskribí pa mediadó di gobièrnu organisá un referèndem pa asina trese e klaridat nesesario. E pruebanan di intimidashon i manipulashon ta bisto.
A yama e trahadónan malkontentu traidor, a bisa públikamente ku si nan bai for di ABVO e CAO eksistente no ta konta mas i ku nan lo pèrdè nan “Kerstbonus”. A bisa nan ku nan mester sigui paga kontribushon te fin dia aña i ku esei ta nifiká ku nan ta mará komo miembro di ABVO te fin di aña. E manipulashon ta kaminda a usa un kolega ku polítikamente ta nombrá ayera den SELIBON pa pasa personalmente serka trahadónan ku tin 10, 15 20 o mas aña den servisio di SELIBON pa konvensé nan pa no bandoná ABVO. Hasta a usa outo di kompania pa kore hasi e kampaña aki. Otro manipulashon ta kaminda kier a trasladá un di e lidernan pa un otro puesto di moda ku e lo no tabatin mas kontakto ku su koleganan. E meta ki ta ba tin un solo propósito, esta pa gerensia mustra e otro trahadónan kiko por pasa ku nan ora nan reklamá. Antó den esaki a demonstrá ku gerensia ku sierto lidernan sindikal ta drumi den e mesun kama. Otro manipulashon ta kaminda a pone un trahadó pa mas ku 2 aña traha un trabou den un otro funshon sin kompensá esaki i menas’é ku e no mester reklamá nada. E último ta kaminda sin ningun elekshon, manera ta preskribí ta nombra un shopsteward i sin avisá e shopsteward nan aktual nada. E forma kon ta trata koleganan femenino na trabou ta klaramente señalnan di falta di rèspèt i deskriminashon.

No ta e promé kaso ku miembronan ta bandoná e sindikato ku nan ta afiliá na dje pa bai afiliá na un otro o lanta nan propio sindikato. Ta dikon ABVO no ta akseptá deportivamente ku meskos ku e trahadónan a afiliá nan tin tur derecho di desfilá. Pakiko tantu intimidashon i manipulashon. Kiko miembronan afiliá na otro kompanianan mester pensa di e aktitut aki di nan lidernan sindikal. Ta e mesun komportashon ta warda nan si nan tin reklamo riba e maneho di nan sindikato?.Pakiko nèt Sindikato ku mester ta pará te dilanti pa defendé DEMOKRASIA i DERECHHONAN FUNDAMENTAL I KONSTITUSHONAL di e ser humano mes ta violando esakinan. Ta realisá kuantu daño ta hasiendo na sindikalismo ku netamente awor aki na Boneiru mester bai hunga i keda hunga un ròl importante den desaroyonan sosial ekonómiko di nos isla i kaminda ta sindikalismo mester bai na protehá i sali na defensa di interesnan di e trahadó i su famia ku ta bou di preshon enorme.

 

Share This
error: Content is protected !!