KRALENDIJK– Zamir Zamir Zamir. Konforme boluntat di Dios, nos ta aseptá despedida di Zamir Ayubi, spiritualmente nos, ta resa pidi señor pa bo ta serka bo yunan. E amor ku bo a ekspresá pa bo yunan no tin niun hende pa igualá Mas ainda, nunka promé mi a mira un tata, asina aktivo ku amor sin spar niun momentu, ku bo muchanan. Algu úniko i ta un ehèmpel pa hopi tata i mama! Bo tabata spesial, un eksepshon kon trata mucha, esta bo yunan.   

Hopi hòmber i muhé ta laga otro i yunan tin ku karga e konsekuensia.  Mi sa masha kaso, sea tata no ta buska drechi di yu, meskos e ta sosodé, ku mama tampoko no ta buska drechi di yu òf yunan. Esnan responsabel no sa kuantu doló nan ta hasi e kriatura. Zamir tabata un ehèmpel klave, no tin èksküs. Ta bo responsabilidat!  

Ami Fittipaldi Pietersz konosé Zamir hopi aña for di tempu di skol (SGB). Nos no tabata amigu. Abo i bo ruman Aimed, tabata poko popular ku asuntunan di Dj etc, asina hopi hende konosé boso for di boso hubentut. Tempu a pasa i mi a kuminsá traha den prensa (2013) i tabata topabo ku frekuensia. Semper semper bo tin algu di papia, komentá, remarka i puntra. Asina semper bo a aserkámi. Tin bia asina eksagerá, ku mi mester hala poko for di bo pa mi por hasi mi trabou komo prensa, durante un rueda di prensa. Manera e reuda di prensa kaba, e tei serka mi atrobe. Na un okashon mi a saka potrèt di dje i a skirbi kon ami ta mir’é komo tata soltero. Un hòmber ku hopi amor pa su muchanan. Te asta ora di kubri aktividat, enkuentro ku prensa, e ta bai ku su yunan. No tur hende tabata masha kontentu. Pero el a demostrá ku nos, esta e i su muchanan ta huntu òf e no ta keda! Zamir bo tabata apart, pasobra úniko ta nos tur. Semper Bòi Antoin sa bisami: Zamir ta traha notisia. E tin nanishi pa notisia.  

Mi sa ku Zamir ta un persona putri di informashon. Momentu mi top’é, e no ta bisami ku hopi palabra tur informashon, sinembargo tur bia e tin kantidat di kos ta trahando riba dje. Serka mi i hopi otro lo bo hasi hopi falta. Kada bia ku mi pensa, skirbi, papia di loke a sosodémi gemoed ta yena… . Dios dun’é un lugá den Su reino. 

 

 

Zamir su último post riba facebook 

 

 

Zamir: “Djabièrnè 17 di Sèptèmber 2021 un dia ku hamas lo mi lubidá. Riba petishon di Dr. Esther Bernabela mi a wòrdu transportá pa Hospital Mariadal. Esaki a tuma lugá parti atardi. For di opname te ora ma drenta Special Care un SERVISIO KALISAT TOP di tur profeshonal ku ta laborá pa e Fundashon aki. Danki e servisionan. Pa loke ta ma mi mes kosnan ta kanando. Mester laga dianan pasa pa mira e avanse pa wak kon ta sigui despues. For di aworakí mi ta informá ku mi NO TIN MAG DI PAPIA NA TELEFON KU NIUN HENDE. ESAKI TA ÒRDU DUNÁ NA AMI. SI BO KIER MANDA UN MEMSAHE DI SOSTÉN +599 7007732. 

POR ÚLTIMO DANKI NA MAMA DI MI YUNAN KU HUNTU KU MI RUMAN STIMÁ AIMED TA TAKE CARE DI E YUNAN. 

STIMA BOSO 4 EVER

Nos amigu, Sosegá na Pas…          

 

Share This
error: Content is protected !!