Bonaire Human Rights Organization i su sekshon “Hóbennan pa Derecho Humano Bonaire” den kolaborashon ku fundashon Nos Ke Boneiru Bèk ta organisá un nochi di pelíkula/nochi di sine ku e tópiko di ‘Konsientisá i empoderá’ kada kuminsamentu di luna. Tur pelíkula den e seri akí lo duna atenshon na talento lokal, talento karibense i talento afroamerikano. Ta importante pa den e tempu globalisá akí nos reflehá riba nos mes kultura i pasado, i pa medio di e seri di pelíkula akí nos ke logra pa prinsipalmente hóbennan sera mas konosí ku e ideanan di hende ku ta parse manera nos i ta pasando den situashonnan komparabel ku nos.

E seri ta kuminsá djasabra benidero, 2 di òktober 2021, pa 7-or di anochi na Plaza Wilhelmina ku e pelíkula ‘Black Panther’ ku a uza staf di produkshon di hende afro-amerikano so i ku nan a nominá ku e prestigioso Academy Award komo “mihó pelíkula” protagonisá pa un super éroe di koló. Tambe ‘Black Panther’ a kibra diferente rèkert komersial internashonal. E pelíkula aki a nifiká un kambio grandi pa Hollywood, ku no sa duna mes un rèspèt i atenshon na e talento di hende di koló. Banda di esei nos a skohe pa kuminsá ku un pelíkula ku ta entrené pero tambe konsientisá i empoderá, komo introdukshon di e seri aki.

Tur nochi di pelíkula lo tuma lugá kada promé djasabra di luna i lo no kosta nada.

Share This
error: Content is protected !!