Djasabra 25 di sèptèmber 2021 Kiwanis Club of Kralendijk, Bonaire a selebrá instalashon di e direktiva nobo pa e aña Kiwanístiko 2021-2022 ku un sena festivo. Durante e evento aki, ku tabata modesto dor di medidanan kontra Covid-19, tambe a instalá miembro noboNatalie Leito ofisialmente.

Den su diskurso Presidente saliente Ricard Nicholson a elaborá tokante e proyektonanrealisá den aña 2020-2021, por ehempel e Radiothon den kolaborashon ku Lions Club Bonaire i Rotary Club Bonaire ku aunke tabata tin medidanan di Covid-19 a rekoudá un bunita montante pa Voedselbank, Voeding op School i e paketenan pa beibi. Tambe Presidente Ricard Nicholson a gradisí tur miembronan pa nan trabou duru i empeño pa yuda muchanan di Boneiru durante su dos añanan di presidensia. Nicholson a desea Presidente nobo, sra. Derchlien Vrolijk-Dijkhoff hopi eksito. Despues di e diskurso, a yama e miembronan di direktiva nobo dilanti pa wordu instalá pa e invitado spesial Luitenant Gouverneur di Distrito 26, sra. Natalie Daal.Despues di a enfatisá e responsabilidat di kada un di e miembronan di e direktiva nobo, LG Natalie Daal a instalá Direktor di Servisio na Komunidat Emily Kocks, Direktor di Rekaudashon di Fondo Marilijne Kats, Direktor di PR Perla Nicholson, Direktor di Miembresia Mimi Dongen, Sekretario Marisol Vrolijk, Tesorero Alicia Xuan-Krijgsman, Èks Presidente Inmediato Ricard Nicholson i Presidente Derchlien Vrolijk-Dijkhoff. Den su prome diskurso komo presidente, sra. Derchlien Vrolijk-Dijkhoff a gradisí Èks Presidente Inmediato Ricard Nicholson pa su trabou duru durante e añanan Kiwanistiko ku ta tras di lomba. Tambe Presidente Vrolijk-Dijkhoff a entregá un plaka di rekonosementu na sr. Nicholson na nomber di tur miembro. Presidente Vrolijk-Dijkhoff a gradisí invitadonan LG Natalie Daal i Presidente di Lions Club Bonairesra. Blancaflor Nicolaas pa nan presensia i a klausurá ku e promesa ku Kiwanis Club of Kralendijk, Bonaire lo sigi traha duru pa bienestar di tur mucha i komunidat di Boneiru.

Share This
error: Content is protected !!