E situashon di COVID-19 na nos isla ta serio. Nos tabatin dos fin di siman tras di otro kaminda un pashènt di COVID a bai sosegá. Nos ta kombibí ku famia di e defuntunan.

 

Nos ta mira ku for di fin di siman e kantidat di kaso di COVID a oumentá i no ta tur fuente ta konosí ainda. Salubridat Públiko ta tene kuenta ku e kasonan por sigui oumentá. Awor ta  prinsipalmente  adulto no bakuná ta pega ku e vírùs.  Awe nos tin 120 kaso aktivo di COVID i tin 1 hende hospitalisá. Nos ta tene kuenta ku na dado momento den futuro kisas nos mester manda pashènt di COVID pa hospital pafó di Boneiru, komo ku aki no tin e kuido nesesario pa nan.

 

Salubridat Públiko ta traha duru pa haña un bon bista di unda e fuentenan di kontagio ta. Ta di lamentá ku ta sosodé tin biaha ku hende no ke koperá ora e departamento ta hasi investigashon di fuente i kontakto. Mi ta lamentá esaki mashá. Mester hasi e investigashonnan akí hustamente pa dominá e kontagionan. Si Salubridat Públiko aserká bo pa partisipá na e investigashon di fuente i kontagio, por fabor hasi esaki i kooperá. Ta na interes di  nos un i tur.

 

Pa awor aki nos ke wak huntu ku Salubridat Públiko  si e kantidat di kaso di COVID ta sigui oumentá i kiko esaki ta nifiká pa sektor di kuido. Despues di evaluá esei nos ta disidí si ta nesesario pa tuma  mas medida i nos lo informá  komunidat di esei. Por lo pronto nos ta mantené e medidanan ku ta na vigor te promé di novèmber benidero.

 

Mi ke menshoná algun di e medidanan: Na  enkuentro den seno privá ta permití maksimalmente 50 hende. Te ainda ta permití un máksimo di 100 hende pa ta presente na un evento. Si bo ta bai un enkuentro deportivo, wak pa bo mantené bo mes na e reglanan durante i despues di e enkuentro.  Awor aki ta tempu pa nos ta èkstra kouteloso i asumí nos responsabilidat.  Asina nos por evitá ku e kantidat di kontagio ta subi. Pèrkurá biba salú, drumi sufisiente, i sòru pa bo keda den moveshon. Pa mas informashon bishitá www.bonairecrisis.com

 

Si bo no a bakuná ainda, bai bakuná.  Mi ke hasi un yamada spesial na hende ku ta den grupo di riesgo, manera hende ku enfermedat di suku, òf ku sobrepeso, òf hende ku problema di kurason, pa nan no tuma riesgo i bai bakuná. Yama 0800 0900 pa traha un sita. Bo por pasa tur djasabra sin traha sita di 09:00 te 14:00 or pa pasa angua kontra corona. Laga nos sigui kuida nos mes i esnan rònt di nos.

Share This
error: Content is protected !!