Direktiva di Fundashon Alzheimer Bonaire ta sumamente satisfecho i gradisido di por a klousurá
luna Mundial di Alzheimer ku un fin di siman ku aktividatnan hopi eksitoso.
Djabièrnè anochi e invitado for di Aruba, Dr Nienke A. A. Smits, spesialista den medisina pa
Grandinan, a presentá na Captain’s Don Habitat e charla “Seksualiteit i intimidat ku demensia”
un tópiko interesante, masha aktual. Dr Smits a ofresé e presentenan informashon mashá balioso
i importante ku a resultá di ta sin duda un tópiko ku hopi hende ta evitá di papia ariba den
práktika.
A base di reakshonnan risibi Direktiva lo bai traha ariba pa trese e tópiko aki mas i mas na
konosementu di nos hendenan, ya ku esei lo kontribuí na kuido i tambe trato di nos hende
grandinan ku demensia i lo kontribuí sigur tambe pa mehorá nan kalidat di bida. E pòrtrèt ta duna
un bista di e anochi.
Djasabra mainta tabatin un seshon di tayer na Fundashon Mariadal Academy di 9 or te 12 or.
Esaki tabata spesialmente pa profeshonalnan den kuido na diferente instansianan di Kuido pero
tambe ku partisipashon di 4 kolaborador di Departamentu di Salubridat Públiko di Entidat
Boneriano, ku e tema “Seksualidat i intimidat ku demensia”. E partisipantenan a hasi un
apelashon riba Direktiva di Fundashon Alzheimer Bonaire pa bini pronto ku un siguiente seshon.
Direktiva ta konsiderá pa muy probabel organisá esaki dentro di 6 luna. Riba e foto e partisipantenan ku nan sertifikado.
Djasabra atardi tabata turno pa nos Dòkternan di kas por a asisti na un seshon di tayer ku e
mésun tópiko, tresé pa dr Smits na Primary Care Caribbean na Kaya Soeur Bartola, di 4.00 or pa
6.30. Gran mayoria di nos dòkternan di kas ku a asistí a ekspresá nan gratitut pa por a partisipá i
haña oportunidat pa por a interkambiá ku un kolega ku un eksperensia tan amplio riba e materia
aki. Despues di e seshon tabata dr Adrienn Vegh, miembro di direktiva di Fundashon Alzheimer
Bonaire ku a entregá e partisipantenan un sertifikado na nòmber di dr Smits i direktiva di
Fundashon Alzheimer Bonaire.
Riba e pòrtrèt e partisipantenan ku nan sertifikado den presensia di dr Smits.
Direktiva di Fundashon Alzheimer Bonaire ta sinti su mes honrá di tabatin e oportunidat pa por a
ofresé e presentashonnan aki na famianan di personanan ku demensia, na dunadónan di kuido,
profeshonalnan den kuido i tambe na nos dòkternan di kas i ta gradisí tur persona i instansia ku a
kontribuí i sigur tambe nos boluntarionan.

Share This
error: Content is protected !!