E miembronan di famia a drenta sala na Consuelo Memorial Boneiru i topa e defuntu drumi den su kaha. Mas despues a kontinuá ku
aktuashon di Boy Thode den e sala, kende a kanta 2 kantika. Promé ku el a kanta el a bisa ta algu doloroso a sosodé i e ta bai hasi esfuerso kanta kantika ku no ta fásil den e momentunan manera awe. El a kanta (Grandi bo ta….) i despues ekspresá algun palabra na presentenan.

“Mi a eksperensia Zamir komo un bon amigu, un fanátiko fiel na agrupashon musikal ERA Outéntiko. Un super bon tata pa su yunan, “Boy a bisa, ku awa na wowo. Ku hopi emoshon el a sigui bisa: “Mi ta bai kanta un kantika ku mi a traha pa mi tata defuntu, awor kantá pa mi amigu Zamir.”(Tata nos tata…) Despues di e kantika, Boy a bisa: ”Zamir, sosegá na pas ruman.”

Aimed Ayubi, ruman di Zamir
“Mi ruman, nunka mi a pensa ku mi ta bai bo entiero pa dera mi ruman mas chikitu. Un parti di mi a bai. Tur hende konosé Zamir, un hende úniko. Ami kuné, nos ta rabia i poko despues, bira bon ku otro. Nos ta diskutí i despues trese pas serka otro. Último tempu nos relashon tabata mas fuerte ku nunka. 1 di sèptèmber nos tabata na un ‘breakfest’, Zamir a brasami i bisa e ke saka un potrèt huntu ku mi. Mi a bis’é oké, sin tabata sa ku esei ta nos último potrèt saká huntu. Nos ta papia ku regularidat, sinembargo no ta muchu huntu den publisidat. E tabata Gusta ERA un mundu.
El a haña e bendita covid-19 i bai guera ku e malesa sin niun stap patras. Dios a disidí otro. El a bisami sierto momentu; kuida e muchanan pe. Mi mester bisa, nan ta bon, nos ta bon. Mi ta bai keda rekord’é manera e tabata. Zamir a bai i Aymed a keda. Athena i ami ta perkurá pa e yunan.”

Muchanan, boso tata stima boso

“Muchanan, mi sa ku boso stima tata hopi. Huntu ku tata boso tabata bai kubri diferente aktividat i si hendenan nenga tata huntu ku boso, e no ta kubri e aktividat, Pues sea boso huntu òf niun hende. Asina ta Zamir. Papi no tei na tera i el lo keda kuida boso huntu ku opa Eddy for di Ariba.

Mi ta kòrda kon el a pèrdè trabou i a lucha i sobrebibí ku su yunan. Boso ta bai hopi bon na skol. Momentu ku Zhena a haña e notisia ku e ta bai HAVO, Zamir a yamami un bes pa kontami, asina kontentu e tabata. Mama i tio Aimed tei pa boso. Danki na tur ku a duna atenshon. Mi no tin palabra pa gradisí. Zamir un hende di tur hende.”

Karta skirbi pa yunan di Zamir
Ku doló na kurashon nos ta despedí di tata awe. Tata tabata rabia ku nos ora nos hasi nos kosnan ménos bunita. E tabata rabia ku nos pa nos mes bon. Bo tabata un tremendo tata. Awe nos ta lagabo los, sinembargo semper tata ta keda den nos kurashon. Nos ta kontentu di tin un tata manera bo. Nos a yora i hari ku bo i bo tabata gusta konta nos di bo pasado, tempu bo tabata mucha manera nos. Ku awa na wowo te despues. Mami i tio Aimed lo pèrkurá pa nos. Tata,Te despues… .”

Pader Aphonsus Baak

E parti di respòns tabata na enkargo di pader Alphonsus Baak. “Famia Ayubi, semper ta den ‘pictures’. Tur dia Aimed, Farid i Zamir ta aktivo. Mi ta spanta sierto momentu ora Zamir presentá na pastorí i ta bisa; e ke hasi entrevista ku mi. Mi ta bis’é mi mester prepará promé i e ta bisami e ta bai bon pastor no wòri.
Hopi bia nos ta buska kaminda drechi pa desaroyonan. Ami a komprondé ora Hesus ta e kaminda. Hopi bia mi no a bai misa ora mi ta hóben, pasobra bai futbòl tabata mas importante. Tabata un preparashon pa mi a bira pastor.
Zamir a topa hopi hende, diferente opinion. Famia ta importante. Sigui kòrda riba tata Zamir, “pader Baak a bisa na e muchanan.
Despues a sigui e momentu doloroso, último despedida, kara pa kara i nunka mas.

Share This
error: Content is protected !!