Luna di Òktober ta e inisio di nos temporada di áwaseru ku ta finalisá den luna di
yanüari 2022. Normalmente alrededor di 60% (365 mm) di áwaseru anual ta kai den
e kuater lunanan aki.
E proyekshon pa e temporada di áwaseru pa e aña aki ta, ku lo e ta mas muhá ku
normal (400-450 mm). E motibu ta ku e fenómeno klimatológiko ENSO den Osean
Pasífiko lo ta den e fase di La Niña. Un situashon di La Niña lo fortifiká formashon di
disturbionan den e atmósfera riba Laman Karibe. Konsekuentemente esaki lo ta
faborabel pa desaroyo di wer ku áwaseru serka nos.
Pronóstiko di áwaseru i mal tempu ta forma parti di e pronóstiko diario di Servisio
Meteorológiko i ta wòrdu publiká pa públiko general tres biaha pa dia. Den kaso ku ta
premirá ku e mal tempu ta di tal índole ku lo por kousa inkonbeniensia general, i por
rekerí atenshon i akshon di Outoridatnan, Servisio Meteorológiko lo emití un boletin
speshal ku un kódigo di kolo. Kódigo hel (mensahe di prekoushon) ta indiká ku e
posibilidat di e impakto lo ta mínimo. Kódigo oraño (vigilansia) ta indiká ku e
posibilidat di e impakto lo ta moderá. Kódigo kora (atvertensia) ta indiká ku ta
eminente ku e impakto lo ta grandi. Kada kódigo ta kontené informashon relashoná
ku e medidanan ku por wòrdu tuma pa minimalisá e impakto. Ta importante pa tuma
nota ku tin sistemanan di mal tempu ku ta intensifiká rápido i ku tin komo
konsekuensia un redukshon di e tempu di alerta trempan i akshon korespondiente.

Manera ya ta konosí, impakto di mal tempu severo ta enserá inundashon, rafaga di
bientu, laman brutu na kosta i welek pisá, lo por pone bida na peliger i kousa
destrukshon na propiedatnan. Den e kuadro aki, Servisio Meteorológiko a anunsiá na
kominsamentu di Temporada di Orkan, ku ta krusial pa tuma medidanan di
prevenshon i pa ta prepará. Asina ta, den kaso di un emergensia, na momento ku
Servisio Meteorológiko emití un boletin speshal, lo tuma tur akshonnan nesesario na
tempu.
Meteo lo sigui hasi lo máksimo usando teknologianan moderno pa brinda pueblo di
Kòrsou, kumpliendo ku Meteo su mishon: Vigilando wer 24/7 pa protehá bida i
propiedat. Meteo ta sigui enkurashá tur hende interesá pa registrá pa risibí boletin
speshal via di nos Whatsapp (+59995601089)

Share This
error: Content is protected !!