Bonaire Human Rights Organization i su sekshon “Hóbennan pa Derecho Humano Bonaire” ke yama danki na tur hende pa nan presensia i e tremendo ambiente na e promé edishon di nos seri di sine bou di e tema: ‘Konsientisá i empoderá’.

Nos a habri e anochi ku un poema konmovedor i poderoso di Sedney Marten. E poema a buta oyentenan pensa tokante imágennan i ideanan negativo ku ta eksistí di hende di koló i kon e persepshonnan akí ta afektá tantu e hende di koló mes komo e hende blanku: di hende blanku ku ta mustra ku nan tin miedu di hendenan di koló, te na hende di koló ku ta menospresiá bunitesa di nan mes koló, alabando idealnan di bunitesa Europeo. Pa kombatí e imágennan i steriotipo negativo di hende di koló, nos di “Hóbennan pa Derecho Humano Bonaire” ta presentá nos selekshon di pelíkula ku imágen positivo.

E promé pelíkula ku nos a mustra den e seri, ta e pelíkula popular ‘Black Panther’, kual ta mustra imágennan positivo i poderoso di un nashon Afrikano frikativo. Esaki pa kombatí e imágen negativo asosiá ku Afrika den media moderno. Na lugá di un Afrika pober i tristu, ‘Black Panther’ ta riku na imágen di rei, reina, guereronan i sientífikonan afrikano i ta trese un mensahe positivo di patriotismo, lealtat i kompashon pa otro.

Apesar di rumornan ku ta sirkulá, e evento no a kontra ku niun problema. BHRO ta kontentu ku e resultado di e nochi di pelíkula. Partisipantenan na e evento a haña kos di bebe i snèk i despues di e pelíkula nos a haña e reakshon ku e partisipantenan a gosa di e anochi.

E seri di sine ‘Konsientisá i empoderá’ lo sigui 6 di novèmber ku un otro pelíkula positivo, poderoso i konsiente, kual nos lo anunsiá pronto.

Share This
error: Content is protected !!