Sindikato ta un organisashon di trahadónan, debí ku trahadónan a bira hopi i te ainda imposibel pa kibra forsa di trahadónan i nan organisashon sin kai den diktadura manera a sosodé den hopi kaso den siglonan pasa.
Industria òf kompania uzando téknika a yuda hende bai dilanti masha hopi mes, pero esei mes a trese kantidat di hende den problema, hamber i pobresa tabata kos di tur dia den kasnan di trahadónan.
Pió ainda ya no ta nan mes ta doño di e loke nan a produsí, al kontrario nan ta produsí pa doño nan i ta haña un pago miserabel.
Ta p’esei sindikatonan tei pa defendé derecho di e trahadónan i nan trabou pa trata na yega na un repartishon mas hustu di bien nan ku e trahadónan mes ta produsí i buska pa mehorá kondishon nan di trabou, alabes progresá den nan trabou.
Komo ku nos lei nan ku mester reglamentá, ta masha difísil pa por regla tur kos, sindikatonan a logra hopi kos pa e trahadónan, pero semper ta keda ku e gran poder pa fiha norma i regla, pero leinan semper ta den man di gobièrnu ku hopi bia ta wòrdu influensia pa esnan ku tin mas poder ekonómiko den un pais òf isla.
Historia di sindikalismo aki na Boneiru tambe ta hopi importante, pa por siña nos, di e lucha di trahadónan, alabes nan organisashon pa derecho di trahadónan.
Tin lidernan sindikal ku a bai sera den prizon durante disturbio laboral den wèlga.
Pa tur loke nos a splika awor ta resultá sin duda, ku sindikatonan no mester buska solamente derecho i interes di nan miembronan pero tambe di e pueblo en general i nos mester tene kuenta ku un kantidat di otro faktor nan den nos komunidat.
Na Boneiru tin hopi pobresa pasobra no tin un partisipashon hustu di tur loke naturalesa ta duna nos.

Sindikato versus koperativa:
Nos ta di opinion ku e trahadónan ta e organisashon sindikal i ku nan mester por funda un koperativa, tambe na bienestar di miembronan sindikal.
E lucha sindikal no ta solamente pa e hende (trahadó), haña su derechonan pero tambe pa nan por siña di otro pa hasi mihó uzo di e loke nan mes tin.
Pa es motibu aki, nan mester lanta tambe nan propio koperativa ku ta un organisashon sosio ekonómiko pa yuda nan mes, hasi mihó uzo di nan salario prinsipalmente.
Un sindikato konsiente huntu ku e trahadónan Boneriano, por progresá pa bai dilanti i tuma e desishon pa organisá su mes di kual su famia tambe ta forma parti.
Sindikato, huntu ku e koperativa bon dirigí i bon manehá, ta e forsa di progreso pa e trahadó Boneriano en general.
E lei di un sindikato:
E lei di un sindikato ta su statuto i su reglanan di kas (huishoudelijke reglement).
Ofisialmente mester entrega e statuto i e miembronan di direktiva aktual na kámara di komersio di Boneiru.
Statuto di AFBW ta preskribí tres tipo di miembresia.
1. Bo por bira miembro individual sin ta mara na un kombenio kolektivo, pero ku hopi benefisio personal.
2. Bo por ta miembro kolektivamente den un hotèl, kompania òf fundashon kaminda ta eksistí un kombenio laboral (CAO).
3. Direktiva di AFBW por proponé i nombra miembronan honorario, pa trabounan sindikal ehersé den pasado pa e trahadónan ku ta miembro di AFBW.

Trahadónan ku ta forma parti di un unidat sindikal, ta sigur di un prosperidat i seguridat sosial.
“ Despues di kada final, tin un komienso nobo ban pe”.

 

Share This
error: Content is protected !!