Kralendijk – Stichting Aquaspeed Bonaire Windsurfers den kolaborashon ku INDEBON, SKAL y Gobiernu di Boneiru ta presenta e di  54 edishon di Bonaire Sailing Regatta 2021 den un forma diferente. Pa motibu di protocol COVID-19 ta wordu organisá solamente e parti di aktividat di kompetensia riba laman.

Registrashon pa tur kategoria lo tuma lugá djabièrnè 8 òktober 2021 di 5or pa 8or di anochi kombina ku un apertura den kura di SKAL den un forma ameno, kumpliendo ku tur e reglanan vigente pa COVID-19.

Programa lo ta yená ku diferente kategoria entre otro Windsurfing, Windsurf Foil, Sunfish, Yate, Kitesurfing, Microboats y Boto di Piskado.

Djasabra 9 òktober y djadumingu 10 òktober lo bai tin kompetensia di windsurfing y sunfish pa mucha na Sorobon. For di 11 pa 13 di òktober lo tin kompetensia di Kitesurfing Downwind y Freestyle na Atlantis Beach.

Djárason 13 òktober entre 7or pa 10or di anochi lo bai tin un Drive-Thru BBQ pa tur e partisipantenan y e boluntarionan organisá pa Stichting Aquaspeed Bonaire Windsurfers i Obersi Group na Kas di Regatta. Kompetensianan pa tur otro kategoria ta sigui dia 14 pa 16 òktober na Kas di Regatta for di 10or di mainta.

Entregamentu di premio i klausura lo tuma lugá djasabra 16 oktober 2021 pa 7or di anochi na SKAL, kumpliendo ku tur e reglanan vigente pa COVID-19.

Aquaspeed Bonaire Windsurfers kier a gradisi tur e kolaboradornan ku ta: INDEBON, Gobiernu di Boneiru, SKAL, Obersi Groep, Constant, Mindful Empire, Blue Water Creators, Bonaire Kiteschool, Kiteboarding Bonaire, BSSA, Frans Paradise, Bonaire Windsurf Place, STINAPA, C3 Communications, Bonaire Logistics, Budget Marine, Budget Rent A Car, Cactus Accounting, Tourism Corporation Bonaire y tur nos boluntarionan.

Share This
error: Content is protected !!