ORANJESTAD – Un biaha den cada tres luna e cuatro Premiernan di Reino ta reuni virtualmente. Dialuna ultimo un di e reunionnan aki a tuma luga cual a wordo dirigi pa Premier Evelyn Wever – Croes. Den e reunion aki conhuntamente cu Premier Mark Rutte di Hulanda, Pik Pisas di Corsou y Silveria Jacobs di Sint Maarten, cada mandatario a trece nan puntonan di interes dilantiy a toca diferente tema cu ta importante den nos proceso di recuperacion.

Premier Wever – Croes a expresa cu e reunion a bay bon y banda di e temanan general cu a trata, a trata tambe Covid y relacion den Reino. Pa locual ta Aruba specifico, Prome Minster a trata e tema importante di sosten di Hulanda pa ‘habri otro portanan’ pa Aruba. Esaki considerando cu poco poco ta bay depende menos di e sosten di likides di Hulanda. Ta referi na entre otro portanan di Nacionnan Uni, IMF, World Bank y Union Europeo, pa por yega na fondonan pa Aruba por cumpli cu e programa cu tin di recuperacion.

“Premier Rutte a bay di acuerdo cu esaki y nos tincu traha riba dje mas padilanti,” Prome Minister a duna di conoce.

Ademas, Prome Minister a splica cu den e reunion, Premier Rutte a duna mas informacion tambe riba e formacion cu ta tumando luga na Hulanda y el a felicita Aruba cu Gobierno nobo den Reino.

Pa conclui, Prome Minister a bisa cu e reunionan aki semper ta bon, e ta bon pa e relacion den Reino y pa keda atende cu e temanan di con pa hiba bo pais dilanti den e constelacion di Reino actual.

Share This
error: Content is protected !!