ORANJESTAD — Den e dianan aki tin rumornan circulando cu Gobierno lo corta mas den salario di empleado publico. E rumor ta bisa e empleado publico pa prepara pa mas medida y cu e medidanan aki lo ta exigencia di Caft. Ta papia di entrega di e diferente premie di ambtenaar completo. Gobierno di Aruba ta enfatisa cu esaki no ta corecto. Esaki ta un otro rumor falso mas cu oposicion ta recuri na dje.

Gobierno a informa sindicatonan den ultimo reunion cu pronto lo cuminsa delibera cu Hulanda ki tempo por cuminsa elimina e recorte riba salario di empleadonan publico y semi publico. Awor Gobierno ta deliberando cu Hulanda riba e sosten di likides di e di 4 kwartaal 2021.

“Pa Gabinete Wever-Croes, goberna nos pais ta algo serio. Aruba ta algo serio. Nos situacion ta algo serio y no pa haci wega y trece rumornan falso. Treciendo rumornan falso pa fin politico, ta un muestra di falta di seriedad pa cu nos pais y ta stroba recuperacion cu nos ta desea. Aruba tin problemanan serio, manera nos tur sa, cu e pandemia a ocaciona. Y ta cu seriedad so nos por atende cu e retonan cu Aruba ta enfrentando. Nos pais ta recuperando y p’esey aworaki nos ta pidi trankilidad pa Gobierno por atende e problemanan serio di likides pa e siguiente lunanan nos dilanti”, Prome Minister a enfatisa.

 

Share This
error: Content is protected !!