Dia 5 di òktober Condé Nast Traveler a anunsiá e resultadonan di su Readers’ Choice Awards anual, kaminda Boneiru a keda rekonosé komo e number 10 den kategoria di Mihó Siudatnan di Mundu – The Best Cities in the World: Readers’ Choice Awards 2021. Ademas a inkluí nos isla, huntu ku Aruba i Kòrsou, komo number 7 den e islanan tòp den region karibense i atlántiko.

Mas ku 800.000 lesadó di Condé Nast Traveler a entregá reakshon den kua nan ta evaluá nan eksperensianan di biahe di rònt mundu pa duna un imágen kompleto di e lugánan ku nan no por warda pa bolbe bishitá un siguiente biaha. E Readers’ Choice Awards ta e forma di rekonosimentu di ekselensia ku a dura mas largu i esun mas prestigioso den industria di biahe. Por haña e lista kompleto di ganadó riba www.cntraveler.com/rca

Segun e CEO di TCB, Miles Mercera: “Condé Nast Traveler ta e revista di biahe lider na Merka. E rekonosimentunan anual akí ta e formanan di rekonosimentu di ekselensia ku a dura mas largu i esunnan mas prestigioso den industria di biahe. E ganadónan di Readers’ Choice Awards, ku den su totalidat ta keda selektá pa medio di voto di lesadó, ta representá lo mihó di lo mihó i nos ta sumamente kontentu di mira Boneiru den e klasifikashon. Mi tin ku bisa, pabien ku e gran logro akí!”

E Readers’ Choice Awards ta keda publiká riba wèpsait di Condé Nast Traveler riba www.cntraveler.com/rca i selebrá den e edishon di novèmber.

Share This
error: Content is protected !!