Kralendijk – Djarason sima pasa Komishon di Sustainability di BONHATA a hasi un bishita di trabou na Selibon su sentro di AVC (shushi i prosesamentu). Miembronan di komishon a risibí un guia informativo (rondleiding), presentá pa ehekutivo di komunikashon Melinda Marchena i konsehero di maneho Shanelca Marta. Na final di e rondleiding a papia kon sektor privá huntu ku sektor publiko por traha huntu na un mihó medio ambiente.

Selibon a demonstrá ku karton, plèstik, metal, aluminio i glas ta keda kolektá i separá den diferente sekshon den e sentro di Shushi & Prosesamentu (A&V) na Kaminda Lagun. Pa medio di separá shushi, diferente material por ser reusá, resiklá òf bendí pa sigui ku otro prosesamentu. Prosesamentu di karton entretantu ta asina eksitoso ku a kumpra un asina yamá “verwerkingspers” aparato ku ta prosesá karton, pa akapará e gran kantidat di karton pa prosesá. Tambe glas kolektá por ser reusá den korto tempu riba nos isla mes.

“Hopi bes mi ta tende ku ora shushi wordu separá i kolektá tur lo bin terminá tog huntu riba ‘landfill’. Pero mi ta kontentu di por mira ku mi mes wowonan ku esaki no ta kuadra ku loke ta wordu bisa,”  Empresario Eric Gietman ta bisa. “Awor ku mi a mira esaki, ku mas plaser mi ta dispuesto pa separá shushi na su fuente pa mi negoshi.”

Una bes ku shushi domestiko bini huntu ku sobrá di shushi, Selibon lo no por separá esaki mas. Selibon ta enfatisá ku ta pa e motibu aki ta importante pa kada ken separá shushi na su fuente.. Esaki ta sòru pa menos shushi yega ‘landfill’ i asina por prosesá mas shushi di forma duradero. Seperashon di shushi al final ta kontribuí na un mihó medio ambiente i un kalidat di bida ainda mas mihó pa nos tur.

Selibon i BONHATA ta traha huntu riba un plan pa yega na separá shushi den e sektor turístiko mas tantu posibel na e fuente. Esaki ta pas ku Boneiru i tambe e ta pas ku e vishon di BONHATA.

 

Share This
error: Content is protected !!