Dia 18 di septèmber 2021 Tourism Corporation Bonaire (TCB)
a lansa su enkuesta pa sondia eksperensia di su bishitantenan. Meta di e enkuesta akí ta pa analisá i evaluá e ‘Eksperensia Boneiru’ di nos bishitantenan. Riba djárason i djasabra for di 12.00 or te 17.00 or ta entrevistá bishitante ku ta saliendo for di nos isla den sala di salida di Bonaire International Airport.

E informashon ku nos ta haña di nos bishitantenan tokante nan ‘Eksperensia Boneiru’ i e puntonan di mehorashon ku nan trese dilanti lo komplementá nos futuro strategia pa desaroyo di turismo konsiderabelmente. TCB ta spera tambe di por midi e kambionan den e panorama turístiko mas mihó i analisá nan den sentido di perfil di bishitante.

E enkuesta pa sondia e ‘Eksperensia Boneiru’ ta kubri diferente área ku ta varia di perfil demográfiko, motivashon, kalidat di e eksperensia, aktividat, satisfakshon, segmentashon, mará na temporada i lo mas importante ta ku e ta duna nos un bista di e puntonan di mehorashon. Ademas, pa medio di esaki TCB i su stakeholdernan lo por midi nesesidat, karakterístikanan di merkado i e impakto ekonómiko general di turismo.

Ta bai tene e enkuesta pa sondia e ‘Eksperensia Boneiru’ anualmente ku komo meta pa entrevistá minimalmente 400 bishitante pa luna. TCB ta gradisido pa e koperashon ku Bonaire International Airport i pa reakshon di nos bishitantenan. E bishitantenan a mira e programa komo un bunita forma pa wak bèk riba nan estadía na Boneiru. Tur bishitante ku partisipá na e enkuesta pa sondia e ‘Eksperensia Boneiru’ ta haña e chèns di nan bida pa gana un biahe bèk pa Boneiru.

Share This
error: Content is protected !!