KANDELA DEN ‘TUINHUISJE’

Riba djaluna 11 di òktober, alrededor di 7 or di mainta un patruya a deskubrí un ‘tuinhuisje’ na kandela den kura di un kas situá na Amboina. Brantwer a bin na e sitio i paga e kandela. Den e ‘tuinhuisje’ tabatin un wasmashin i un kolchon. Probablemente un waya di ekstenshon a kousa e kandela. Ta investigando e kaso.

 ATRAKO DEN KAS

Riba djadumingu 10 di òktober, pa mas o ménos 11 or di anochi, sentral di polis a risibí notifikashon ku un atrako a tumalugá na un kas situá na Nawati. Durante di e atrako e malechornan a los algun tiru. No tabatin herido. Tabata trata di tres persona ku kara tapá. E kaso ta bou di investigashon.

 KÒNTRÒL DI TRÁFIKO

Den oranan di anochi riba djabièrnè 8 di òktober a tene kontrol di tráfiko na dos diferente sitio, un na Kaya Korona i un na Bulevar Gobernador Nicolaas Debrot.

Na Kaya Korona a kontrolá un total di 41 vehíkulo, bou di kua a duna 12 prosèsferbal. Tambe a konfiská un kantidat chikitu di hash na momentu ku a pasa over pa un kòntròl den kuadro di e Lei di Opio dor ku a sinti holó fuerte di droga ora a para e outo.

Na Bulevar Gobernador Nicolaas Debrot a kontrolá un total di 35 vehíkulo, kaminda a duna dos prosèsferbal.

E prosèsferbalnan tabata pa entre otro, kore sin reibeweis , sin seguro i sin fahadi seguridat bisti.

Durante di un kontrol di tráfiko den oranan di mainta riba djasabra 9 di òktober na Kaya Libertador Simon Bolivar, a kontrolá e estado tékniko di vehíkulonan i e papelnan ofisial nesesario. Aki a kontrolá un total di 16 vehíkulo i a duna un total di 4 prosèsferbal pa manehá sin faha di seguridat bisti.

Riba djadumingu 10 di òktober, alrededor di 6.20 or di atardi a tene un kontrol di tráfiko na Kaya L.D. Gerharts kaminda para i kontrolá 3 vehíkulo. A duna 3 prosèsferbal, bou di kua 2 pa kore sin faha di seguridat i 1 pa kore sin seguro.

 A HÒRTA BAISKEL

Den oranan di manta riba djasabra 9 di òktober a drenta keho di ladronisia di un baiskel kolo pretu di marka ‘Rockhopper’. E baiskel tabata den un baki di pikòp ku tabata stashoná na un kas situána Kaya Esther. Ta investigando e kaso.

 A TOPA KURPA SIN BIDA

Den oranan di atardi riba djabièrnè 8 di òktober, sentral  di polis a risibí notifikashon ku un persona a bira malu na Rincon. Na yegada di ambulans i patruya e persona no tabata duna señal di bida. Despues di un investigashon dòkter a deklará morto natural. Ta trata di e dam di inisial S.S.M.A. di 37 aña di edat.

AKSIDENTE KU SKUTER

Alrededor di 11.25 or di mainta riba djabièrnè 8 di òktober un aksidente ku un skuter a tuma lugá riba Kaya Korona. Ambulans a transportáshofùr di e skuter hospital pa tratamentu médiko.

 

Share This
error: Content is protected !!