Bonaire Human Rights Organization i su sekshon “Hóbennan pa Derecho Humano Bonaire” huntu ku Global Entrepeneurship Week ke yama danki na tur hende pa e asistensia haltu i e tremiendo ambiente na e di dos edishon di nos seri di sine: ‘Konsientisá i empoderá’.

Global Entrepeneur Week ke inkluí tur hende, pa asina siña komunidat ku kompartimentu di komosementu ta yuda tur hende bai dilanti. Nos ke enkurashá empresarionan i pueblo en general pa komparti sabiduria i pa buska oportunidat kaminda tin un buraku den lokal komundat por ofresé. Kada desafio por bira un oportunidat!

Lokual ku NKBB tin komo meta, pa siña hoben tokante di nan derechonan basiko, ta tremendo. Hopi no sa mes kiko nan derecho ta. Si tin un hende ku ke yuda e hobennan ku e parti ei nos ta gara e hende ei ku man I pia. Nos ta sostene e nochi di sine aki espesialmente paso esaki ta un pelíkula traha na ex-Antias, ku ta mustra hobennan ku nos ke i nos por ta kreativo.

Nos a habri e anochi ku un otro poema profundo di Sydney Marten ku a enkurashá oyentenan pa para firme den kara di oposishon, pa sigi kere den bo meta asta si bo ta e uniko ku ta kere den bo meta i  pa pensa kritiko di lokual nos ta enkontra diario.

A kontralio di e prome anochi, nos a skohe pa un pelíkula lokal i independiente pa e di dos anochi. E pelíkula produsí na Korsou, yamá ‘Buladó’, ta konta e storia pensivo i emoshonal di un hoben ku ta lamentando su mama ku nunka e no a haña chèns di konosé. E hoben, Kenza, buskando un manera pa dil ku e ousensia di su mama, ta hañ’é mei mei di su tata ku ta un homber serio ku pensamentu moderno i su welo ku ta buskando e mundu spiritual di su ansestronan. E pelíkula ta mustra kon Kenza ta kana e liña fini entre e dos figuranan aki den su bida. Kombina ku imagennan bunita di nos isla hermana Korsou, e pelíkula aki a tuma tur hende presente riba un biahe di un ora i mei.

BHRO un biaha mas ta kontentu ku e resultado di e movie night. Mes kos ku biaha pasa, un gran kantidat di hende ku a pasa banda di e evenemento a kai sinta den a parke rondo di e pantaya, pa asin’ei tambe por a gosa di e pelíkula. E seri di sine ‘Konsientisá i empoderá’ lo sigi 4 di decèmber ku un otro pelíkula positivo, poderoso i konsiente, kua nos lo anunsiá pronto.

Share This
error: Content is protected !!