A hòrta skuter
Riba djadumingu 21 di novèmber a drenta keho di ladronisia di un skuter kolo shinishi ku pretu di marka Kymco, modèl Agility, numerá MF-226. E skuter tabata stashoná ku lòk di stür den kura di un kas situá na Kaya Benue. Entre djasabra 20 di novèmber i djadumingu 21 di novèmber, deskonosínan abai ku e skuter i tambe dos tayer di baiskel ku tabata den balkon. Ta investigando e kaso.

Vários aksidente ku skuter
Alrededor di 2.30 or di mardugá riba djadumingu 21 di novèmber, sentral di polis a risibí notifikashon ku un persona mester a kai for di skuter na Seru Largu. Na yegada a resultá ku e shofùr i pasahero a kai dor ku nana kore dal den un buraku den kaminda. Ambulans a transportáámbos pa hospital pa tratamentu médiko.

Riba djaweps 19 di novèmber, tambe un aksidente ku un skuter a tuma lugá riba Kaminda Gurubu. Pa motibu deskonosí e shofùr di e skuter a kai. Ambulans a transporte pa hospital pa kòntròl i tratamentu médiko.

Alrededor di 7.15 or di anochi riba djárason 17 di novèmber, un aksidente ku un skuter a tuma lugá riba Kaya Internashonal. Pa motibu deskonosí eshofùr i kai i ambulans a hib’ehospital pa tratamentu di su heridanan. A bai ku su skuter warda di polis pa te ora ku e ta sinti mihó , e bin busk’e.

Outo na kandela
Riba djaweps 19 di novèmber sentral di polis a risibí notifikashon ku tabatin un outo na kandela na Kaya Corantijn. Na yegada di patruya ya brantwer tabata atendiendo ku trabounan di paga e kandela. A resultá ku tabata un outo bieu tabata na kandela. Kousa di e kandela no ta konosí. No tabatin niun herido.

Ladronisia na sitio di sambuyá
Riba djárason 17 di novèmber a drenta keho di ladronisia na e sitio di sambuyá ‘Tailor Made’ , den besindario di Brasil, pega ku e almasenahe di krudo. Miéntras e doñonan tabata sambuyá, deskonosínan a bai ku un oloshi di sambuyá kolo pretu di marka ‘Suunto’ i un pòtmòni ku sènkèsh komo kontenido for di den nan outo. E outo no tabata na lòk. Ta investigando e kaso.

A plama aglomerashon di hende dilanti di un establesimentu di hórèka
Riba djárason 17 di novèmber, alrededor di 12.15 or di mardugá, sentral di polis a risibí notifikashon ku aglomerashon tabata tumando lugá dilanti di un establesimentu di hórèka situá na Kaya Boneiru. Na yegada di patruya enbèrdat por a nota un grupo grandi di hende pafó di establesimentu ku si tabata será kaba. E agentenan a hasi un supliká na esnan presente pa bandoná e sitio, ku kua mesora tur hende a kumpli.

Share This
error: Content is protected !!