Kralendijk – awe na momentu ku ya nos a yega e periodo di fin di aña 2021, i konforme tradishon nos tur ta preparando pa konmemorá òf selebrá nasementu di niño Hesus,  direktiva di UPB ke pidi bo atenshon –tòg un ratu– pa un splikashon kòrtiku pero importante.

Últimamente nos tur por a sigui e bataya den medionan di komunikashon riba e presunto ilegalidat den e kaso di importashon di santu pa ku konstrukshon di e hotèl Chogogo, na e sitio kaminda ántes tabata situá Hotèl Bonaire. Djabièrnè último nos a risibié e veredikto di hues, i nos por komprondé ku hues a duna Chogogo rason konforme nan petishon. Resultado di e veredikto aki ta ku gobièrnu awor tin 5 siman pa trata e petishon di chogogo di nobo.

E desishon aki di parti di hues ta mustra ku Kolegio ehekutivo imuy espesialmente diputado James Kroon i gezaghebber Rijna, a analisá e situashon korektamente i a tuma e desishon pa warda veredikto di hues promé ku aktua. No opstante e preshon inmenso di parti di media i opositornan, nan a para fuerte riba nan análisis i no a laga nan mes wòrdu persuadi pa tuma kualke desishon deskabeyá. E desishon aki a skapa gobièrnu di Boneiru un suma fuerte di plaka pa loke ta trata daño i perhuisio. E desishon aki ta mustra un biaha mas ku eksperensiata un elemento indispensabel den kualke organisashon.

Nos ta komprondé ku e desishon aki lo no kai den bon tera serka hopi. E emoshon aki ta di komprondé. Nos tambe ta sintié. Nos tambe ta djaki i nos tambe ta biba aki. Sinembargo nos mester adheri na leinan i reglanan ku nos tur huntu a instalá i pone na vigor. Nos niun no ta para riba lei, no opstante kon doloroso òf kon fèrfelu un desishon por ta. Loke nos ta konsehá gobièrnu ta pa sera fila. Pone kabesnan huntu i atendé tur posibel buraku den e prosedura nan vigente i relatá esakinan na e vishon i metanan di Boneiru. Asina nos por logra mitigá e situashon i prevení ripitishon.

Share This
error: Content is protected !!