Kralendijk – Na e momentu aki , 74 di e 228 konekshonnan di kas a ser realisá na Belnem. E plan ta pa finalisá e konekshonnan di kas pa e di dos kuartal di 2022. A finalisá trabounan di kobamentu den Kaya Gemini , Kaya Sagitario , Kaya Tauro, Kaya Urano i Kaya Merkurio. Segun ekspektativa e trabounan di kobamentu den Kaya Neptuno lo ser finalisá pronto. A realisá aproksimadamente 3.7 kilometer di trabou di kobamentu i a  instalá aproksimadamente 2900 meter di tuberia i a realisá 74 konekshon di kas. Ademas e stashon di vaküm nobo 5 na Kaya Saturno ta kla pa ku 85% i tin 8 pòmp nobo di vaküm instalá. Na e momentu aki 75 % di e trabounan a keda ehekutá pa e proyekto di Belnem. WEB komo supervisor di e proyekto a duna Truckland e kontratista enkargá ku e proyekto e tarea pa drecha algun kaya na Belnem i kaminda ta nesesario yena ku diabas. Esaki a keda hasi den vários kaya pa laga esakinan mas aksesibel pa abitantenan durante e periodo di fin di aña. E trabounan di kobamentu lo stòp durante e temporada di fiesta, pero un ekipo lo keda disponibel pa trabounan di mantenshon chikitu di e kamindanan. Tambe lo hasi algun trabou na e stashon di vaküm. Durante e periodo di vakashon, e mayoria di e trabounan di kobamentu pa e sistema di kloaka lo stòp temporalmente ( 24 di desèmber 12:00 p.m te ku 2 di yanüari). For di 3 di yanüari, lo sigui ku e trabounan relashoná ku kobamentu pa restu di kaya Saturno ( entre Pos di Wanapa i Resort Bonaire) i di EEG Bulevar ( entre Ocean Oasis i Pos di Wanapa). WEB komo supervisor di e proyekto ke yama danki pa e komprenshon i koperashon i ta deseá un i tur felis dianan di fiesta.

Share This
error: Content is protected !!