Apresiabel Kolegio,

Ku asombro mi a tuma nota di deklarashonnan di diputado P. J. Kroon den medionan sosial, den kua e ta indiká ku mester pensa pa duna e tereno di BOPEC otro destinashon. E ta motivá su pensamentu entre otro a base di e supuesto ponensia ku lo no tin interesado pa kontinuá ku operashon di almasenahe di produktonan petrolero i tambe ku mirando ku Boneiru a skohe pa “blue destination”, un almasenahe di produktonan petrolero lo no ta kuadra den e vishon ei.

Mas asombrá mi a keda, ya ku tantu Kolegio Ehekutivo, Konseho Insular, Diálogo Sentral, den kua tantu e organisashon di dunadónan di trabou komo sindikalismo semper a boga pa tene BOPEC habrí i kontinuá ku e operashon, mirando e benefisionan ekonómiko, sosial i finansiero ku esaki lo tinpa nos isla. E deklarashon di BOPEC bankarota tabata tambe ku e mira pa tre­se klaridat i asina mas lihé posibel logra un kontinuashon di e operashon.

Tambe a asombrá mi persona ku e supuesto “vishon” nobo di e diputado òf Kolegio Ehekutivo aki nunka a keda presentá na Konseho Insular komo parti di e programa di gobernashon aktual, miéntras ku e di tres reportahe di e “Curator” ta kontradesí totalmente e ponensianan di e diputado, esta ku no tin interes pa operá e fasilidat. Al kontrali e reportahe ta indiká ku tin hopi interes i ku ta netamen­te Kolegio Ehekutivo tin ku karga su responsabilidat den esaki pa asina duna mas garantia na esnan interesá pa bin ku proposi­shon­nan konkreto pa tuma e operashon.

Ta di lamentá ku apesar di tantísimo korespondensia di parti di mi persona pa ku e kaso di BOPEC, kaminda no ménos ku 400

hendea pèrdè trabou, Kolegio Ehekutivo, fuera di a pone 250 mil dòler pa paga salario di e kuerpo di trahadónan ku a keda pa vigilá e seguridat di e fasilidat no a hasi ningun esfuerso konkre­to pa man­te­né e operashon di e fasilidat.

Ta p’esei hasiendo uso di artíkulo 45 di nos Reglamentu di Ór­den, mi ta hasi e siguiente preguntanan na Kolegio Ehekutivo:

  1. Kolegio Ehekutivo a tuma nota di deklarashonnan di e miembro di Kolegio P. J. Kroon relashoná ku kontinua­shon di operashon di BOPEC?
  2. Kolegio Ehekutivo ta pará tras di tal deklarashonnan i por a fasilitá Konseho Insular e desishon di esaki tumá pa Kole­gio Ehekutivo?
  3. Kolegio Ehekutivo a hasi un inventarisashon di interesado­nan den e kompania BOPEC pa sigui ku operashon di e kom­pania?
  4. Pregunta na Diputado P. J. Kroon spesífiko: Diputado P. J. Kroon a hasi un inventarisashon di interesadonan den BOPEC?
  5. E Curator a indiká den su di tres reportahe algun punto ku ta kai bou di responsabilidat di Kolegio Ehekutivo. Kolegio Ehekutivo ta disponé di e di tres reportahe aki i tam­be tin konosementu di e loke e Curator ta pidi?
  6. Si pregunta 3 ta si, Kolegio Ehekutivo por a fasilitá Raad e reakshonnan ofishal di parti di Kolegio Ehekutivo pa ku e petishonnan hasi pa e Curator?
  7. Kolegio Ehekutivo por indiká ki korespondensia tin òf ta­ba­tin entre e Curator i Kolegio Ehekutivo?
  8. Kolegio Ehekutivo por fasilitá Raad ku tur korespondensia entre Kolegio Ehekutivo i e Curator den kaso di BOPEC mas pronto posibel i dentro di 2 siman?
  9. Kolegio Ehekutivo a hasi esfuerso (entre otro pidi konse­ho) pa sondia e posibilidatnan pa Entidat Públiko sea bira doño o partisipá den un kompania ku lo tuma over BOPEC?
  10. Kiko ta e posishon ofishal di gobièrnuHulandes pa ku kontinuashon di operashon di BOPEC na Boneiru?
  11. Tin un estudio ku ta indiká ki opshonnan realístiko ta ek­sistí pa ku kontinuashon di operashon di BOPEC ta viabel i realisabel? E estudio aki a analisá tambe e impak­to sosial-ekonómiko i finansiero di un posibel kontinua­shon di ope­ra­shon di BOPEC?

Nos ke risibí e kontestanan verbal den e próksimo reunion públiko di Konseho Insular.

Share This
error: Content is protected !!