ORANJESTAD – Un di e metanan mas importante di e Acuerdo di Cooperacion firma na April 2021 door di tur e Chief Executive Officers y Managing Directors di e 6 aeropuertonan comercial di Caribe den Reino Hulandes, ta pa colabora pa mas trafico aereo sostenibel, stabil y economico entre e aeropuertonan di Caribe.

Basa riba e meta aki, Aruba Airport Authority N.V. den nomber di DCCA, lo organisa un evento internacional di 1 siman yama “Sustainable Air Transportation Event” na Aruba na November 2022. Durante e siman aki, DCCA lo presenta alternativanan di transporte aereo enfoca riba futuro pa asina mehora coneccion entre e islanan di Caribe Hulandes. E obhetivo di esaki ta pa informa y familiarisa e comunidad en general cu e solucionnan cu tin actualmente y pa cuminsa combersa riba e diferente opcionnan pa aviacion sostenibel cu representante di compania-, partner-, den aviacion, instituto-, den educacion, instituto di estudionan, gobierno-, consultante- y inversionistanan y cu tur cu ta interesa den e topico aki.

Conhuntamente cu Royal Netherlands Aerospace Centre (NLR), DCCA lo trece e “NLR two-seater electric aircraft” for di Europa pa e evento aki pa ehecuta diferente “test flights” for di Aeropuerto di Aruba. Un grupo di studiante den region y companianan local cu ta interesa, lo tin e oportunidad pa traha riba e preparacionnan, armamento y desarmamento di e avion y na mes momento e comunidad lo tin e oportunidad di bishita e avion pa asina ricibi un splicacion riba e operacion-, beneficio-, y retonan. DCCA ta den contacto cu autoridadnan corespondiente pa asina realisa e vision den Reino Hulandes, trece conocemento y defini con pa sostene DCCA su iniciativa.

Durante e evento, diferente topico lo wordo trata den seminario-, y workshopnan manera:
1.      Estudionan actual y futuro desaroyonan riba tecnologia rond di mundo relata na aviacion sostenibel, electrico y otro alternativanan pa “fossil-fuel-based aviation”
2.      Oportunidad pa negoshi y retonan pa aeropuerto-, y aerolineanan pa bira mas sostenibel
3.      Posibilidadnan pa conecta e islanan via un sistema di transporte publico

CEO di AAA, Sr. Joost Meijs a indica cu DCCA ta cla pa e evento na November 2022 y ta conta cu e sosten y participacion di diferente stakeholder den Caribe Hulandes y internacional. “Un coneccion aereo mehora, mas sostenibel y economico lo stimula “island hopping tourism”, mercado laboral, servicio pa salud y engrandece rednan social”.

Si bo organisacion ta interesa pa colabora riba ideanan, participacion of tin otro sugerencia pa e evento na November 2022, por tuma contacto cu DCCA Advisor, Sra. Angeline Flemming na a.flemming@airportaruba.com.

Share This
error: Content is protected !!