1. R.P. (Roald) Lapperre ta bira e Direktor-General Relashonnan den Reino na e ministerio di Asuntunan Interior i Relashonnan den Reino (BZK). Konseho di minister a aprobá e proposishon di minister Bruins Slot di Asuntunan Interior i Relashonnan den Reino. E nombramentu ta entrante promé di sèptèmber 2022.

E Direktor-General Relashonnan den Reino (DGKR) ta responsabel pa realisashon di un agènda integral pa Aruba, Kòrsou, Sint Maarten i pa Boneiru, Saba, Sint Eustatius, i tur otro tarea temporal, asignashon, programa i proyekto ku ta surgi for di esaki. Kaminda otro ministerionan tin e responsabilidat, komo partner, ta fungi den un ròl di duna direkshon i kordinashon. Ademas DGKR lo bai pone atenshon pa sigui desaroyá e direktorado-general. Tambe DGKR tin un ròl den e área di siguridat riba e islanan i e ta presidente di e tim di krísis atministrativo. Finalisando e DGKR ta enkargá ku karteranan ku ta toka mas ku un ministerio den e hunta di direktiva di e ministerio di BZK. Roald Lapperre: “Mi ta honrá ku mi nombramentu. Den e último añanan mi a traha intensivamente ku Hulanda Karibense i den mi ròl nobo, ku hopi plaser i konvikshon lo mi duna mi koperashon na e agènda di kolaborashon amplio ku e parti Karibense di Reino. Mi ta spera ku huntu ku koleganan na Den Haag i riba e islanan nos por traha riba amplia i profundisá aun mas e relashonnan riba multitut di tema ku ta konektá nos“Ku Roald nos tin un direktor-general eksperensiá pa e retonan di DGKR. Roald tin hopi eksperensia riba tereno di maneho i sa tambe kon kos ta funshoná den ehekushon. E tin eksperensia amplio den kolaborashon dentro di departamento i kolaborashon ku e parti Karibense di Reino. Roald tin konosementu i abilidat ku ta hasié kapas pa huntu ku otro departamento konstruí brùg entre e ambishon polítiko-atministrativo di Den Haag i interes di e paisnan i Hulanda Karibense. Mi ta spera yegada di Roald,” e sekretario-general Maarten Schurink ta bisa.

Roald Lapperre for di ougùstùs 2017 ta direktor-general Medioambiente i Internashonal na e ministerio di Infrastruktura i Maneho di awa. Promé ku esaki e tabata entre otro direktor Maneho di awa general i Siguridat, tambe direktor-general suplente di Espasio i Awa, na loke ántes tabata ministerio di Infrastruktura i Medioambiente i direktor Maneho di agrikultura i Siguridat di alimentashon, tambe direktor-general suplente Agro, na loke ántes tabata ministerio di Asuntunan Ekonómiko. Roald a studia Ingenieria di Kultura na Universidat di Wageningen. A yega na e nombramentu aki a base di e prosedura pa e grupo di tòp mènedjer di ‘Algemene Bestuursdienst’. Bureau ABD i ministerio di BZK tabata enkargá ku reklutamentu i selekshon pa e nombramentu aki. Manera ta kustumber, a hasi e vakatura konosí di manera amplio, pa asina tur hende por solisitá.

Share This
error: Content is protected !!