E sistema di protekshon soshal di Hulanda ta enfoká riba e garantia di e seguridat soshal (na un nivel adekuá) di su habitantenan. Sinembargo den Hulanda Caribense tin un otro sistema ku na Hulanda. Tristu pero bèrdat: e sistema di protekshon soshal di Hulanda Caribense no ta ekivalente na esun di Hulanda. Konsekuentemente mas ku 40% di kas di famia na Boneiru ta bibando pa largu tempu kaba den pobresa.

Siman pasá Rijksdienst Caribisch Nederland a bin ku e notisia ku ta bai modernisá e seguridat soshal di Boneiru, Saba i Sint Eustatius. Lo tin un proyekto di lei sperando riba konsulta. Den e dokumentonan di e proyekto di lei aki nos a tuma nota ku meta di e kambio den lei ta pa hiba e sistema di protekshon soshal di Hulanda Caribense na un nivel mas ekivalente na esun di Hulanda. Ta pará ku e sistema di protekshon soshal mester ta prepará pa futuro i mester disponé di un sistema ekilibrá di palabrashon, derechi, obligashon i entrada garantisá.

Un hende lo bisa:” bon i bonita”. Pero esei lamentabelmente no ta e kaso. Ku e modernisashon aki e ekivalensia ta keda difisil pa mira. Unkobon ta di opinion ku e seguridat soshal i un sistema ekilibrá di palabrashon, derechi, obligashon i entrada garantisá por wòrdu lográ si primeramente gobiernu Hulandes introdusí un minimo soshal disente pa e Islanan BES manera esei ta e kaso na Hulanda ya pa años. Esaki no ta inkluí den e modernisashon.

E asina yamá modernisashon ta solamente algun detaye sekundario. E siguiente mehorashon/modernisashon Rijksdienst CN ta menshoná:
1. ahuste den reglamentu di vèrlof pa empleado i independientenan na estado
2. ekstra supsidio pa yu pa mayornan ku tin yu ku mester di kuido ekstra mural
3. afan pa re-integrá i aktivá empleadonan enfermiso i personanan inkapasitá pa traha

Loke Rijksdienst CN no ta menshoná ta ku gastunan di e areglo di vèlof i di e areglo di re-integrashon di empleadonan pa un gran parti mester wòrdu kargá pa doñonan di trabou. Desplasamentu di gastu di e promé tres dianan di enfermedat di un empleado ta kosta doñonan di trabou $ 450.000,00 pa aña. Esaki ta un ahoro pa Reino. Vèrlof di un partner ora su kasá duna lus ta kosta Reino $ 90.000.00, e ahuste di supsidio pa yu $ 160.000,00. No a kalkulá e gastunan di e doñonan di trabao pa e dianan ekstra di vèrlof pa motibu di embaraso.

Loke Rijksdienst CN tambe a lubidá di menshoná (konsientemente??) ta ku den e proyekto di lei tin skondí oumento di edat pa risibí penshun. Di 65 pa 66 aña den 2030.
E eliminashon di e “duurtetoeslag” pa Saba i Statia tampoko no ta wòrdu menshoná ps Rijksdienst CN
Bon mirá e modernisashon anunsiá ta solamente algun ahuste mashá chikí na fabor di e habitantenaan di Islanan BES. Mas aleu Reino ta ekonomisá ku kambio di e lei aki. Un chupon!!

Unkobon ta di opinion ku gobiernu Hulandes mester stòp ku e tipo di stapnan chiki aki ora ta trata ahuste di e sistema di protekshon sosial di islanan BES. E ahustenan aki no ta kondusí na un sistema di protekshon sosial ekivalente na esun di Hulanda. Ketu bai e in-ekivalente ta keda na vigor.

Unkobon ta boga pa posponé e medidanan anunsiá i ta pidi gobierno Hulandes pa dediká atenshon i energia pa garantisá e seguridat sosial na Boneiru, Saba i Statia introdusiendo un minimo soshal disente riba kual e lucha kontra pobresa realmente por wòrdu basá.
A bira tempu pa kuminsá ku e lucha kontra pobresa. 12 aña despues di 10-10-10!!

Share This
error: Content is protected !!