Riba djárason 3 di ougùstùs Koninklijke Marechaussee (KMar) a detené dos persona na Aeropuerto Internashonal di Boneiru (BIA) riba sospecho di falsifikashon di dokumentu di biahe. Ta sospechá ku e dos sospechosonan intenshonalmente a hasi uso di dokumentu di biahe falsifiká durante di kòntròl na frontera

E dos sospechosonan, un hòmber kolombiano di 36 aña di edat i un dama kolombiano di 40 aña di edat, tabatin intenshon di biaha pa Colombia. Na momentu ku e estranheronan a ofresé nan pasport na e empleadonan di Koninklijke Marechaussee pa kòntròl di salida, a resultá for di un investigashon ku a eliminá un steker ofisial for di tur dos pasport.

Investigashon mas aleu a resultá ku e dos sospechosonan a drenta e isla den novèmber 2021. E tempu ei Koninklijke Marechaussee a imponé un asina yamá ‘toelating onder voorwaarde’ (TOV). Na papiamentu, un atmishon kondishonal. Segun e lei di atmishon i deportashon BES (Wet Toelating en Uitzetting BES, WTU-BES)  KMar por imponé un TOV pa por supervisá mihó ku estranhero no ta kumpli ku su deber pa ku supervishon di estranhero. Un TOV por nifiká ku e estranhero durante di su estadia dentro di Hulanda Karibense mester mèldu su mes na supervishon di estranhero di KPCN, òf por limitá estadia di e estranhero te na un kantidat di dia pa evitá ku e ta resultá den ilegalidat. Ora imponé un TOV, KMar ta pone un steker den e pasport di e persona konserní. Den kaso di e dos personanan aki, a resultá ku a eliminá e steker di TOV konserní for di ámbos pasport.

Ahustá òf eliminá informashon ku ofisialmente a agregá na un dokumento di biahe ta un delito ku posiblemente tin kastigu di prizòn mará na dje. Ofresé un dokumento falsu òf falsifiká intenshonalmente tambe ta kastigabel. Koninklijke Marechaussee ta e momentu aki ta investigá ámbos kaso. E dos sospechosonan ta keda den aresto preventivo den e Instituto Hudisial Hulanda Karibense (JICN).

Share This
error: Content is protected !!