Riba 4 di Augustus Terramar Museo den presensia di prensa, amigunan i kolaboradonan a drenta un periodo nobo. Ku e lema  investigashon | museo | | komunidat ta indika pa hunga un rol grandi pa komunika e historia Boneriano. Pa logra esaki Terramar Museum a informa ku lo instala un eksposishon nobo ku lo atrahe tantu e komunidat lokal komo turista. Banda di e kolekshon lo tin aktividatnan ku ta trese e hoben i hende nan di mayor di edat huntu pa stimula pensamento kritiko tokante nos presente i futuro.

 

E kolekshon

En kolaborashon ku FUHIKUBO i Felicia Schütte, Museo Terramar ta trahando riba un eksposishon nobo kaminda ku e kultura Boneriano ta para sentral. E eksposishon permanente nobo su enfoke lo ta for di diferente perspektiva riba e periodonan importante di e histroia di Boneiru, kuminsando na e prome sosiedat i ta kaba na e kambio institutional na 10-10-10. Manera den e kolekshon anterior, e historia di sklabitut tin un luga importante den e museo. Lokual ku lo ta nobo den e kolekshon ta e emfasis riba patrimonio tangibel i intagibel di Boneiru. Ta spera ku e kolekshon nobo, ku pa gran parti ta finansia pa Stichting Mondriaan Fonds, ta kompleta pa bishitantenan na 2023.

 

E aktividatnan

Museo Terramar ya a realisa eksitosamente hopi evenemento despues di pandemia di Covid-19.  Por ehempel, Museo Terramar a ehekuta un siman largu di Global Money Week i a hasi kolaborashon ku diferente organisashon riba nos isla. Den futuro Museo Terramar ta spera pa sigi realisa mas di e kolaborashonnan. Pa ku esaki, WNF (Wereld Natuur Fonds) ya a drenta un akuerdo di kolaborashon ku Terramar Museum pa ku e aktividatnan di komunidat ku ta ofrese manera: News Cafè, Eksposishonnan i nochinan di pelikula. 

 

Edukashon

 

Pa Terramar Museum ta importante ku e generashonnan hoben tambe por sigi gosa i siña di e museo i nos histroria. Además e kolekshon nobo lo anima e muchanan ku banda di e tekstonan, lo bini tayernan tambe. E tayernan aki ta finansá pa Cultuurpartisipatie i lo ta basá riba topikonan di e kolekshon nobo. E prome tayer di teater lo kuminsa na september, sigí pa un tayer di arte i un tayer di kontamento di storia. 

 

Bo ke tuma despedida kaba di e kolekshon bieu? Terramar Museum ta habrí di djaluna pa djabierne, di 9:00-14:00. Djabierne anochi 5 di augustus un exposishon temporal ‘Art for Life de Marz World y OfftheGrid’ di un artista lokal lo kuminsa.

 

Salú riba un futuro nobo!

Share This
error: Content is protected !!