Pa e okashon aki, AFBW a introdusí tambe “Pekùp sindikal AFBW”.
AFBW ta kere den fasilidat nan i ekiponan pa por duna mihó servisio na su miembronan.
Aña 2022 tabata un aña mas di hopi reto i hopi trabou pa AFBW, direktiva di AFBW por mira bek riba un aña 2022 hopi positivo i ku hopi logro pa ku e klase trahadó.

Fasilidatnan i ekiponan ta importante den e mundu moderno di sindikato.
Mester tin un kas òf un kantor sindikal , mester tin un lokalidat pa duna lès i salanan di reunion pa por reunié ku miembronan. Aparatonan moderno di komunikashon no por keda afó den e mundu moderno aki.
Tambe ta di sumo importansia, un vehíkulo sindikal pa por move kuné, sigur si bo mira na kuantu organisashon AFBW tin representashon i ku mester hiba diferente bishita na e organisashon nan aki.

AFBW su direktiva a opta ku no por sigui hasi uzo di vehíkulonan personal, AFBW ta un sindikato sólido i ku ta apliká su statuto i regla di kas. Un sindikato ku tur su kosnan ta na òrdu, un sindikato ku ta parti su relato finansiero na tur su miembronan i tambe na organisashon nan kaminda ku e tin representashon.
AFBW su relatonan finansiero ta wòrdu aprobá pa un akountent rekonosé.
Direktiva lo sigui duna servisio na miembronan i e klase trahadó manera e la bini ta hasi kaba.
AFBW ta hasi un yamada na miembronan pa por postulá nan mes pa elekshon di direktiva 2022 – 2025.

Direktiva kier yama tur miembro danki di ta forma parti di e famia grandi di AFBW.
AFBW ta pidi e klase trahadó ku no ta afiliá na un sindikato pa por hasi esaki  den forma kolektivo.

AFBW ta gradisí tur e trahadónan ku a buta nan konfiansa den e sindikato aki i ta pidi tur trahadó pa keda den Union, paso den Union tin Forsa.

Share This
error: Content is protected !!