KRALENDIJK, – Fundashon Plataforma Kultural a risibí un karta di Entidat Públiko Bonaire ku anunsio di otorgamentu di un supsidio provishonal na e fundashon, bou di restrikshon ku Konseho Insular i e Minister di Asuntu Interno i di Relashon denter di Reino, ta aprobá e presupuesto 2023. Nos gradisimentu ta bai pa e esaki.

Direktiva di Fundashon Plataforma Kultural ta sumamente kontentu ku e karta di Entidat Públiko Bonaire. Esaki ta nifiká ku Hòfi Kultural por keda habrí den 2023 pa aktividat pa hende grandi. Di e forma akí nos ta kontribuí konhuntamente na un komunidat kreativo, inklusivo i sosial. Na desèmber e fundashon ta hasi 12,5 aña di eksistensia i esaki nos ta selebrá ku aktividat festivo pa e grandinan riba 13 di desèmber i e presentashon di un publikashon tokante e trabou di e fundashon.

Nos ta yama tur e grandinan danki pa e kampaña di e aña akí ku ta yegando na su fin den kua nos a enfatisá konhuntamente e importansia di e aktividatnan na Hòfi Kultural. Tambe nos ta yama danki na Stichting DOEN, Fonds voor Cultuurparticipatie i Samenwerkende Fondsen, e partnernan di kolaborashon manera ZW groep i MHC i tambe na Direktorado Komunidat i Kuido.

Share This
error: Content is protected !!