KRALENDIJK, – Djaweps 17 di novèmber Diálogo Sentral, konsistiendo di representantenan di Entidat Públiko Boneiru, dunadónan di trabou i sindikatonan, a tuma despedida di diputado Den Heyer. Huntu ku diputado Thielman nan a forma den e último añanan e representashon di Entidat Públiko Boneiru

Den e periodo tras di lomba Diálogo Sentral a manda hopi konseho i a sigui un kantidat di e temanan den e Akuerdo di Kralendijk. E temanan prinsipal ku Diálogo Sentral ta atendé ta kombatimentu di pobresa dor di oumentá e kompensashonnan sosial, oumento di salarionan i rebaho di gastunan pa tantu famia komo pa empresanan.

Entrante 1 di yanüari 2023 Ministerio di Asuntunan Sosial i di Labor lo oumentá e kompensashonnan sosial i sueldo minimo. Ku esaki no solamente penshonadonan, hendenan ku ta kobra ònderstant i trahadónan ku tin sueldo minimo ta bai dilanti, pero tambe esnan ku ta gana mas ku sueldo mínimo ta bai dilanti. Riba tereno di rebaho di gastunan i mehorashon di e modelo pa hasi ganashi tambe a dal pasonan, pero esakinan no ta sufisiente pa Diálogo Sentral. Lo keda pone atenshon riba e tópikonan aki.

E reunion di 17 di novèmber tabata e delaster reunion pa diputado den Heyer, kende entrante 1 di dezèmber lo baha komo diputado. Vise-presidente Mervyn Stegers, na nòmber di tur miembro di Dialogo Sentral a gradisí e diputado pa su esfuerso inkansabel i determinashon. Komo regalo algun alumno di Komunidat di Skol a ofresé un obra artístiko ku nan a traha bou di guia di Tatiana Nicolaas.

Share This
error: Content is protected !!